ހދ.ކުޅުދުއްފުށީގެ ކަރަންޓުގެ ޙާލަތު ރަނގަޅު ކުރުމަށް 2 ޖަނަރޭޓަރ ފޮނުވާ، އިންސްޓޯލް ކުރުމުގެ މަސައްކަތް ފަށަން ތައްޔާރު ވެއްޖެކަމަށް ފެނަކަ ކޯޕަރޭޝަނުން ބުނެފިއެވެ.

ފެނަކަ ކޯޕަރޭޝަނުން ބުނީ، ހދ.ކުޅުދުއްފުށްޓަށް ދިމާވެފައިވާ ކަރަންޓުގެ މައްސަލަ ޙައްލު ކޮށްދިނުމަށް 600 ކިލޯވޯޓުގެ 2 ޖަަނަރޭޓަރު މިހާރު އެރަށަށް ފޯރުކޮށްދީފައިވާކަމަށެވެ. އަދި، ލަސްތަކެއް ނުވެ ޖަނަރޭޓަރުތައް އިންސްޓޯލް ކުރުމުގެ މަސައްކަތް ފަށާ ކަރަންޓުގެ މައްސަލަ ހައްލުވެގެން ދާނެކަމަށެވެ.

މީގެ ކުރިންވެސް ކުޅުދުއްފުށިން ބައެއް ވަގުތުތަކުގައި ކަރަންޓު ކެނޑޭ މައްސަލަ ހައްލުކުރުމަށް ވަނީ 800 ކިލޯވޯޓުގެ ޖަނަރޭޓަރެއް އިންސްޓޯލްކޮށްފައެވެ. ނަމަވެސް ކަރަންޓުގެ މައްސަލައަށް އެންމެ އެދެވޭ ހައްލެއް ނުލިބި ވަނީ ގިނަ ދުވަސްތަކެއް ވެފައެެވެ.

ކަރަންޓުގެ މައްސަލަ ހައްލުކުރުމަށް ފެނަކަ ކޯޕަރޭޝަނުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މި މަހުވެސް ބައެއް ރަށްރަށުގައި ޖަނަރޭޓަރު އިންސްޓޯލްކުރުމުގެ މަސައްކަތް ފަށާފައިވާއިރު 5 ރަށަކަށް ޖެންސެޓު ފޮނުވުމުގެ މަސައްކަތް ފަށާފައިވާކަމަށް ފެނަކަ ކޯޕަރޭޝަނުން މައުލޫމާތު ދެއްވައެވެ.

މިހާރަކަށް އައިސް ބައެއް ރަށްރަށުން ކަރަންޓު ކެނޑޭ މައްސަލަ ބޮޑުވެފައިވަނީ އިންޖީނުތައް މަރާމާތުނުކޮށް ގިނަދުވަސްވެގެން ކަމަށާއި، އަލަށް އިންސްޓޯލް ކުރެވޭ ޖަނަރޭޓަރުތަކާއެކު، ރަށްރަށުގައި ދިމާވާ ކަރަންޓުގެ މައްސަލައަށް ދާޢިމީ ޙައްލެއް ލިބޭނެކަމަށް ފެނަކަ ކޯޕަރޭޝަނުން ވަނީ ބުނެފައެވެ.