ނިމިދިޔަ ރައްޔިތުންގެ މަޖިލިސް އިންތިހާބުގައި ދުވާފަރު ދާއިރާގެ ވޯޓު ފޮށިތައް އަލުން ގުނަން ޖެހޭފަދަ ހާލަތެއް ނެތްކަމަށް އިލެކްޝަންސް ކޮމިޝަނުން ނިންމައިފިއެވެ.
ދުވާފަރު ދާއިރާގެ ވޯޓު ފޮށިތައް އަލުން ގުނައިދޭން އެދުނީ އެ ދާއިރާއަށް އަމިއްލަ ގޮތުން ވާދަކުރެއްވި އިބްރާހީމް އަބްދުއްރަހްމާން އެވެ. އޭނާ އެ ފޮށި އަލުން ގުނަން އެދުނީ އޭނާ އާއި އެ ދާއިރާގެ ގޮނޑި ކާމިޔާބު ކުރި ކެންޑިޑޭޓާ ދެމެދު އެންމެ ހަތަރު ވޯޓުގެ ފަރަގެއް އޮތުމުންނެވެ.
އެގޮތުން، އީސީން އާންމުކޮށްފައިވާ އިންތިހާބުގެ ވަގުތީ ނަތީޖާ ދައްކާ ގޮތުން އޭނާއަށް 1،070 ވޯޓު ލިބުނު އިރު އިންތިހާބު ކާމިޔާބު ކުރެއްވި ޕީއެންސީގެ މުހައްމަދު އަލީއަށް ލިބުނީ 1،074 ވޯޓެވެ.
އެ ދެ ކެންޑިޑޭޓުންގެ އިތުރުން، ދުވާފަރު ދާއިރާއަށް ދެން ވާދަކުރެއްވި އެމްޑީޕީގެ ކެންޑިޑޭޓް އިސްމާއީލް އަހުމަދަށް ލިބިލެއްވީ 579 ވޯޓެވެ. އަދި ޖޭޕީން ވާދަކުރެއްވި އަޒްލީން އަހުމަދަށް ލިބިލެއްވީ 77 ވޯޓެވެ.
މަޖިލިސް އިންތިޚާބުގެ ރަސްމީ ނަތީޖާ މިއަދު މެންދުރުފަހު 2:30 ގައި އިޢުލާންކުރާނެކަމަށް އިލެކްޝަންސް ކޮމިޝަނުން ވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
