މަޖިލީހުގެ ބޮޑު އަޣްލަބިއްޔަތެއް ސަރުކާރު ހިންގާ ޕާޓީ، ޕީޕަލްސް ނެޝަނަލް ކޮންގްރެސް، ޕީއެންސީއަށް ލިބިފައި އޮތް ނަމަވެސް އޭގެ ނާޖާއިޒު ފައިދާ ނުނަގާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ދައުލަތުގެ މީޑިއާގެ ރޭގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން ޝިޔާމް ވިދާޅުވީ މަޖިލީހުގެ ސުޕަ މެޖޯރިޓީ މި ސަރުކާރަށް ރައްޔިތުން ދީފައިވަނީ ރައްޔިތުންނަށް ވަރަށް ބޮޑަށް އިތުބާރު ކުރާތީ ކަމަށެވެ. 

ޝިޔާމް ވިދާޅުވި ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވުމުންވެސް އެމްޑީޕީގެ މެޖޯރިޓީ އޮތް މަޖިލީހުން ފެނިގެންދިޔައީ ސަރުކާރަށް ދަތިކުރުމުގެ މަސައްކަތް ކުރާ ތަން ކަމަށާ، އެ މަނިކުފާނުގެ މެނިފެސްޓޯ ތަމްފީޒުކުރުމަށް ހުރަސް އަޅުައްވަމުންދީޔަ ތަން ކަމަށެވެ. އެހެން ކަމުން، އެ މެނިފެސްޓޯ ތަންފީޒު ކުރުމަށް ޒިންމާދާރު މަޖިލީހެއް ރައްޔިތުން ބޭނުންވެ ސަރުކާރަށް ސުޕަމެޖޯރިޓީ ދީފައިވާކަން އޭނާ ފާހަގަކުރެއްވިއެވެ. 

މިއާއެކު ޝިޔާމް ވިދާޅުވީ ހިނގަމުންދާ 19 ވަނަ ރައްޔިތުންގެ މަޖިލީހުގައި މައިނޯރިޓީ ޕާޓީގެ ގޮތުގައި ޕީޕީއެމް އަދި ކޮންގްރެސް ޕާޓީއަށް ބޮޑެތި ދަތި އުނދަގުލާ އެހެން ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން 20 ވަނަ މަޖިލީހުގައި އެ މަންޒަރުތައް ނުފެންނާނެ ކަމަށެވެ.

."މި ހިނގާ 19 ވަނަ މަޖިލީހުގައި އަޅުގަނޑުމެން ފެށިއިރު ވަރަށް އުނދަގޫ، ވަރަށް މަދު މެންބަރުންކޮޅެއް އަޅުގަނޑުމެންގެ ތިބީ. އަޅުގަނޑުމެން ބިލަކަށްވެސް އަދި ބޮޑު މުހިންމު އިޝޫއަކަށް ވާހަކަދައްކަން ފަށާއިރު ހަމަ ހަ ފަރާތުން ހަޅޭއްލަވާ، ފުރައްސާރަ ކުރާ މަންޒަރު ފެނިގެންދިޔައީ. އެއީ މިއަދު ރާއްޖޭގެ ރައްޔިތުން ބަލަން ބޭނުންވާ މަންޒަރެއް ނޫން. އަޅުގަނޑުމެން މި ޔަގީންކުރަނީ އަޅުގަނޑުމެންގެ ސަރުކާރެއް ނިސްބަތްވާ ޕާޓީއެއްގެ ސުޕަ މެޖޯރިޓިއެއްގެ ނާޖާއިޒް ފައިދާ އަޅުގަނޑުމެން ނުނަގާނެ. އިރާދަ ކުރެއްވިއްޔާ ޒިންމާދާރު މަސައްކަތް ތަކެއް ފެންނާނީ،" މި ހިނގަމުްދާ 19 ވަނަ މަޖިލީހުގެ ނައިފަރު ދާއުރާގެ މެންބަރުކަންވެސް ކުރެއްވި އަޙްމަދު ޝިޔާމް ވިދާޅުވިއެވެ.

މީގެ އިތުރުން ޝިޔާމް ވިދާޅުވީ 20 ވަނަ މަޖިލީހުގައި ފެނިގެންދާނީ މައިނޯރިޓީއަށް އިހުތިރާމް ކުރާ މެޖޯރިޓީއެއް ކަމަށެވެ.