ރައްޔިތުންގެ މަޖިލީހުގެ ކޮންމެ ދައުރެއްގައި ވެސް މަޖިލީހުގެ ގޮނޑި އިތުރުވި ނަމަވެސް އިންތިހާބުވާ އަންހެން މެމްބަރުންގެ އަދަދު މަދުވުމަކީ ވިސްނަން ޖެހޭ ކަމެއް ކަމަށް އިލެކްޝަން ކޮމިޝަން (އީސީ) ގެ ރައީސް ފުއާދު ތައުފީޤު ވިދާޅުވެއްޖެއެވެ.
މިދިޔަ ހަފްތާގެ އާދިއްތަ ދުވަހު އޮތް މަޖިލިސް އިންތިހާބުގެ ދާއިމީ ނަތީޖާ އިޢުލާން ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ފުއާދު ވިދާޅުވީ، ދައުރަކަށް ވުރެ ދައުރެއް މަޖިލީހަށް އިންތިހާބުވާ އަންހެން މެމްބަރުންގެ އަދަދު މަދު ކަމަށާއި، މިއީ ވިސްނަން ޖެހޭ ކަމެއް ކަމަށެވެ.
އެގޮތުން ފުއާދު ވިދާޅުވީ، އިންތިހާބުގެ ނަތީޖާ ދައްކާގޮތުގައި 20 ވަނަ މަޖިލިހަށް ހޮވިފައިވަނީ 3 އަންހެނުން ކަމަށެވެ.
"މީގެ ކުރީފަހަރު 4 އަންހެން ބޭފުޅުން، އޭގެ ކުރީ ފަހަރު 5 އަންހެން ބޭފުޅުން، އޭގެ ކުރީ ފަހަރު 6 ހޮވިފައިމިވަނީ. ފަހަރަކު އެއްބޭފުޅަކު މަދުވަމުން މިދަނީ. ގޮނޑީގެ އަދަދު އިތުރުވަމުން ދިޔަ ކަމަށް ވިޔަސް ވެސް."
ފުއާދު ވިދާޅުވިއެވެ.
މަޖިލިސް އިންތިޚާބުގައި 93 ދާއިރާއަކަށް ވާދަކުރެއްވި 368 ކެންޑިޑޭޓުންގެ ތެރެއިން 43 ކެންޑިޑޭޓުންނަކީ އަންހެނުން ނަމަވެސް އިންތިޚާބު ކާމިޔާބުކުރެއްވުނީ އެންމެ 3 އަންހެން ކެންޑިޑޭޓުންނަށެވެ. އެއީ މާފަންނު މެދު ދާއިރާއަށް ވާދަކުރެއްވި އަސްމާ ރަޝީދާއި ނިލަންދޫ ދާއިރާއަށް ވާދަކުރެއްވި ފާތުމަތު ސައުދާ ގެ އިތުރުން ހުރާ ދާއިރާއަށް ވާދަކުރެއްވި ޑރ. އަނާރާ ނައީމެވެ.
މީގެ ތެރެއިން އަސްމާ އާއި ސައުދާ އިންތިހާބުގައި ވާދަ ކުރެއްވީ ސަރުކާރުން ހިންގާ މައި ޕާޓީ ޕީއެންސީގެ ޓިކެޓުގައެވެ. އަދި ޑރ.އަނާރާ އިންތިހާބުގައި އަމިއްލަ ގޮތުން ވާދަ ކުރެއްވި ނަމަވެސް އެކަމަނާ ވަނީ ފަހުން ޕީއެންސީ އާއި ގުޅިވަޑައިގަންނަވާފައެވެ.
Advertisement
This content is created and paid for by advertisers and does not involve Voice Journalists
