މަސްތުވާތަކެތީގެ މައްސަލައެއްގައި މީހަކު 100،000 ރުފިޔާ އިން ޖޫރިމަނާކޮށް 24 އަހަރާއި 11 މަހާއި 13 ދުވަހަށް ޖަލަށްލާން ކްރިމިނަލް ކޯޓުން ޙުކުމް ކޮށްފިއެވެ.
މަސްތުވާތަކެތީގެ މައްސަލައެއްގައި ހައްޔަރުކޮށްފައިވަނީ ގދ. ފިޔޯރީ/ ގަދަކޯޅީމާގެ، އަހުޒަރު އަހުމަދެވެ. އޭނާ ހައްޔަރުކޮށްފައިވަނީ މ. ސެސްނާ/ ފަސްވަނަ ފަންގިފިލާގެ އެޕާޓްމަންޓްގައި މަސްތުވާތަކެތި ރައްކާކޮށް ބޭނުންކޮށް ގެންގުޅެ އެ ތަކެތީގެ ވިޔަފާރިކުރާ ކަމަށް ފުލުހުންނަށް ލިބުނު މައުލޫމާތަކާ ގުޅިގެން 2019 ވަނަ އަހަރުގެ ޖަނަވަރީ މަހުގެ 8 ވަނަ ދުވަހު އެވެ.
އެ މައްސަލައިގައި އަހުޒަރުގެ މައްޗަށް ދައުލަތުން ކޮށްފައިވަނީ ޑައިމޯފިން ޓްރެފިކްކުރުމުގެ ދައުވާއެވެ.
މި މައްސަލައާ ގުޅިގެން އޭނާ ހައްޔަރުކުރުމަށް ފަހު ކޯޓު ޢަމުރެއްގެ ދަށުން އޭނާގެ ހާޒިރުގައި ފުލުހުން ވަނީ އެ އެޕާޓްމަންޓަށް ގޮސް އެޕާޓްމަންޓް ބަލައި ފާސްކޮށްފައެވެ. އަދި އެ ފާސް ކުރުމުގައި އެ ތަނުން ފުލުހުން ވަނީ މަސްތުވާތަކެތި ހޯދައިފައެވެ.
މައްސަލަ ބެލުމަށްފަހު ކްރިމިނަލް ކޯޓުން ކުރި ހުކުމުގައި ވަނީ، ހުށަހަޅާފައިވާ ހެތްކާއި ގަރީނާއިން ދައްކާ ގޮތުގައި ޝައްކެއް ނެތް މިންވަރަށް އެ މައްސަލަ އޭނާގެ މައްޗަށް ސާބިތުވާ ކަމަށެވެ.
އެހެންކަމުން ޑައިމޯފިން ޓްރެފިކް ކުުރުމުގެ ކުށުގައި 24 އަހަރާއި 11 މަހާއި 13 ދުވަހުގެ މުއްދަތަށް ޖަލަށްލުމާމަށް ވަނީ ހުކުމްކޮށްފައެވެ. އަދި 100،000 ރުފިޔާ އިން ޖޫރިމަނާ ކޮށް، 12 ދުވަހުގެ ތެރޭގައި އެ ފައިސާ މޯލްޑިވްސް އިންލެންޑް ރެވެނިއު އޮތޯރޮޓީ (މީރާ) އަށް ދައްކަންވެސް ހުކުމުގައި ވަނީ އަންގައިފައެވެ.
Advertisement
This content is created and paid for by advertisers and does not involve Voice Journalists
