ޗައިނާގެ ހައިވޭއެއްގެ ބައެއް ވެއްޓި، ހައިވޭ އިން ދަތުރުކުރަމުންދިޔަ މީހުންގެ ތެރެއިން މަދުވެގެން 24 މީހުން މަރުވެ އެތައް ބަޔަކު ޒަޚަމްވެއްޖެއެވެ.

ޗައިނާގެ ގުއަންޑޮންގްގެ މެއިޒޯގައި ހުންނަ މެއިޒޯ-ޑަބޫ އެކްސްޕްރެސްވޭގެ 50 ފޫޓުގެ ބައެއް ވެއްޓިފައިވަނީ ރޭ މެންދަމު 02:10 ހާއިރެވެ. ހައިވޭ ވެއްޓުމުގެ ސަބަބުން ހައިވޭއިން ދަތުރުކުރަމުންދިޔަ 20 ކާރު ވެއްޓި އޭގެ ކުޑައިރުކޮޅެއް ފަހުން ކާރެއްގައި ވަނީ އަލިފާން ރޯވެފައެވެ.

ޗައިނާގެ ދައުލަތުގެ މީޑިއާ ޝިންހުއާ ނިއުސް އެޖެންސީ އާއި ދަ ޕޭޕަރ އިން ރިޕޯޓުކުރާ ގޮތުގައި މި ހާދިސާގައި މިހާތަނަށް މަދުވެގެން 24 މީހުން މަރުވެފައިވާއިރު އިތުރު 30 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ. މައުލޫމާތު ލިބޭގޮތުގައި ހޮސްޕިޓަލުގައި ފަރުވާދެމުންދާ އެއްވެސް މީހެއްގެ ޙާލު ސީރިއަސްއެއް ނޫނެވެ.

މި ހާދިސާގެ އޭރިއަލް ފޫޓޭޖެއް މިހާރު މީސްމީޑިއާގައި ދަނީ ދައުރުވަމުންނެވެ. 

ޗައިނާގެ ގުއަންޑޮންގ ޕްރޮވިންސްގައި ފަރުބަދަމަތީގެ މި ހައިވޭގެ ބައެއް ވެއްޓުނީ ބޯކޮށް ވާރޭ ވެހުމުގެ ސަބަބުންނެވެ.

ގަދަ ވިއްސާރައިގެ ސަބަބުން ގުއަންޑޮންގް އަށް ފާއިތުވި ހަފްތާތަކުގައި މި ނޫނަސް ގިނަ އަދަދެއްގެ ނުރައްކާތެރި ކާރިސާތަކެއް ވަނީ ކުރިމަތިވެފަ އެވެ. އެގޮތުން، އޭޕްރީލް 21 ވަނަ ދުވަހު 12 ގަޑިއިރަށް ބޯކޮށް ވާރޭ ވެހި ހަތަރު މީހަކު މަރުވެފައިވާ ކަމަށް ދަ ގާޑިއަން އާއި ބީބީސީން ބުނެ އެވެ. އަދި ދާދި ފަހުން އޭޕްރީލް މަހުގެ 27 ވަނަ ދުވަހު ގުއަންޒޯ އަށް ތޫފާނެއް އައިސް ފަސް މީހަކު މަރުވެ 33 މީހަކު ޒަހަމްވެފައިވާ ކަމަށްވެސް ދަ ގާޑިއަން އިން ބުނެ އެވެ.