ބިން ހުރި ރަށްތަކުގައި އައު އިންޖީނުގެ އެޅުމުގެ މަސައްކަތް މި އަހަރު ފަށާނަނެ ކަމަށް ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ ވިދާޅުވެއްޖެއެވެ.

މިރޭ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުުން ފަހުމީ ވިދާޅުވީ މިހާރު ސްޓެލްކޯއިން ހިންގާ 33 ޕަވަރ ހައުސްގެ ތެރެއިން ބައެއް ރަށްތަކުގައި ރައްޔިތުންނާ ވަރަށް ކައިރީގައި، އަޑު ނުވަތަ ދުމުގެ އުނދަގޫ ވާ ހިސާބުގައި އިންޖީނުގެތައް އެބަހުރި ކަމަށެވެ. އަދި ގިނަ ރަށްރަށުގައި މީހުން ދިރިއުޅޭ ހިސާބުގައި ހުރި އިންޖީނު ގެތައް ދުރަށް ބަދަލު ނުކޮށް ހުރީ ބިން ނެތުމުން ކަމަށެވެ. 

ނަމަވެސް ބިން ހުރި ރަށްރަށުގައި އައު އިންޖީނުގެތައް އެޅުމުގެ މަސައްކަތް މި އަހަރު ފަށާނެ ކަމަށް ފަހުމީ، ވިދާޅުވިއެވެ.

Advertisement

މީގެ އިތުރުން ބައެއް ރަށްރަށުގައި ބިން ހިއްކުމުގެ މަޝްރޫޢޫތައް މިހާރުވެސް ކުރިއަށް ދާކަން ފާހަގަ ކުރައްވާ ފަހުމީ ވިދާޅުވީ، ބިން ހިއްކި، ޖާގަ ލިބުންހާ އަވަހަކަށް އެ ރަށްރަށުގެ އިންޖީނުގެތައްވެސް މީހުންނަށް އުނދަގޫ ނުވާނެހާ ދުރަށް ބަދަލު ކުރާނެ  ކަމަށެވެ.

ރަށްރަށުގައި މީހުން ދިރިއުޅޭ ހިސާބުގައި އިންޖީނުގެތައް ހުންނާތީ އެކަމުގެ އުނދަގޫ ބައެއް ރަށްރަށުގެ ރައްޔތިތުން ދަނީ ވަރަށް ކުރިންސުރެވެސް ތަޙައްމަލު ކުރަމުންނެވެ. މި މައްސަލަ ރައްޔިތުންނަށް ޙައްލުކޮށްދިނުމަށް ސްޓެލްކޯއިން ދަނީ، އިންޖީނުގެތައް ދުރަށް ބަދަލުކުރުމުގެ މަސައްކަތް ކުރަމުންނެވެ. އެގޮތުން މި އަހަރުވެސް ވަނީ މީހުން ދިރިއުޅޭ ސަރަހައްދުގަ ހުރި ސްޓެލްކޯގެ ތިން އިންޖީނުގޭގެ ބަދަލަށް އައު އިންޖީނުގެ އަޅާ ރައްޔިތުންނަށް ލުއި ކޮށްދީފައެވެ.