ވިޔަފާރި ރެޖިސްޓްރީ ކުރުމުގެ މަރުހަލާ އަވަސްކޮށް، ރަނގަޅު ކުރުމަށް އިކޮނޮމިކް މިނިސްޓްރީ އާއި މޯލްޑިވްސް އިސްލާމިކް ބޭންކް (އެމްއައިބީ)އިން އެއްބަސްވުމެއްގައި ސޮއިކޮށްފިއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓުން ބުނިގޮތުގައި، މިއީ ވިޔަފާރި ރަޖިސްޓްރޭޝަން ވެރިފިކޭޝަން ޕްރޮސެސް އަވަސްކޮށް މިހާރަށްވުރެ ރަނގަޅަށް ކުރިއަށް ގެންދިއުމަށް މަގުފަހިކޮށްދިނުމުގެ މަޤުސަދުގައި ޑޭޓާ ހިއްސާ ކުރުމަށް ވެވޭ އެއްބަސްވުމެކެވެ.
މިއީ މިފަދައިން ޑޭޓާ ހިއްސާކޮށް ރައްކާތެރިކަން ކަށަވަރު ކުރުމަށް ޓަކައި މިިނިސްޓްރީން މިފަދަ އެއްބަސްވުމެއް އެކުލަވާލި ފުރަތަމަ ފަހަރުކަން ފާހަގަކޮށްލެވެއެވެ.
މި އެއްބަސްވުން ބިނާވެފައިވަނީ، ވިޔަފާރި ޕޯޓަލެއް ކަމަށްވާ ބޮލި އޭޕީއައިއަށެވެ. މި ޕޯޓަލް ފަރުމާކޮށްފައިވަނީ ވިޔަފާރިތަކުން ރަޖިސްޓްރޭޝަން ޑޭޓާއާއި އައިޑެންޓިޓީ ޔަގީންކުރުމަށް ހޭދަކުރާ ވަގުތު ވަރަށް ބޮޑަށް ކުޑަކުރުމުގެ މަގުސަދުގައެވެ. މި ޕޯޓަލް މެދުވެރިކޮށް ވިޔަފާރި ފެށުމަށް ބޭނުންވާ ޑޮކިއުމަންޓުތައް އޮންލައިންކޮށް ލިބޭނެ އިންތިޒާމް ހަމަޖެހޭނެއެވެ.
މި ޕޯޓަލްގެ ސަބަބުން ރަޖިސްޓްރޭޝަން އަވަސްވުމާއި، ކަސްޓަމަރުންނަށް ދޭ ޚިދުމަތް ރަނގަޅުވުމާއި މައުލޫމާތުގެ ރައްކާތެރިކަން ކަށަވަރުވުން ފަދަ އެތައް ފައިދާއެއް ލިބިގެންދާނެއެވެ.
Advertisement
This content is created and paid for by advertisers and does not involve Voice Journalists
