ދިވެހި ފުލުހުންގެ ޚިދުމަތާއި އިމިގްރޭޝަންގެ ނަމުގައި ސްކޭމް ކޯލްތަކެއް ކޮށް، ފޭރެމުންދާތީ އެކަމާއިމެދު ސަމާލުވާން އެދިއްޖެއެވެ.
ފުލުހުންގެ ޚިދުމަތުގެ ލޯގޯ ބޭނުންކޮށްގެން ރާއްޖެއިން ބޭރުގެ އެކި ނަންބަރުތަކުން ވަޓްސްއެޕް މެދުވެރިކޮށް ފުލުހުންގެ ނަމުގައި އެކި މީހުންނަށް ގުޅަމުންދާ މައްސަލާގައި އެ އިދާރާއިން މީސްމީޑިއާގައި އާއްމުކުރި ޕޯސްޓެއްގައި ބުނީ، ފުލުހުންގެ ޚިދުމަތުގެ ލޯގޯ ބޭނުންކޮށްފައިވާ ރާއްޖޭން ބޭރުގެ ވަޓްސްއަޕް ނަމްބަރަކުން، މީހުންނަށް ގުޅައިގެން ބޭންކު ކާޑުގެ މައުލޫމާތާއި ޒާތީ މައުލޫމާތު ހޯދުމަށް މަސައްކަތް ކުރަމުންދާކަމަށެވެ.
މިގޮތުން ވަޓްސް އެޕުން ވީޑިއޯ ކޯލްކޮށް، ކޭޝް ކާޑާއި ކްރެޑިޓް ކާޑު ދެއްކުމަށާއި އައިޑީ ކާޑު ދެއްކުމަށް އެދެމުންދާ ކަމަށާ އެގޮތަށް ވީޑިއޯ ކޯލް ކުރާ މީހުން ތިބެނީ މޫނު ފޮރުވައިގެން ކަންވެސް ފުލުހުންގެ ޚިދުމަތުން ފާހަގަކޮށްފައިވެއެވެ.
މީގެއިތުރުން އިމިގްރޭޝަންގެ ނަމުގައި ރާއްޖެއިން ބޭރުގެ ނަންބަރުތަކުން މިގޮތަށް ގުޅައި އައިޑީ ކާޑު ދެއްކުމަށާއި ޒާތީ މައުލޫމާތު ދިނުމަށް އެދެމުންދާކަން ވެސް ފާހަގަކުރެވިފައިވާ ކަަމަށް ފުލުހުން ވަނީ ބުނެފައެވެ.
އެހެންކަމުން މިގޮތަށް ގުޅާ މީހުންގެ ކޯލުތަކަށް ޖަވާބު ނުދިނުމަށާއި ކާޑުގެ އެއްވެސް މައުލޫމާތަކާއި އޯޓީޕީ ކޯޑު އަދި ޒާތީ އެއްވެސް މައުލޫމާތެއް ނުދިނުމަށް ފުލުހުންވަނީ އިލްތިމާސްކޮށްފައެވެ. އަދި ރާއްޖެއިން ބޭރުގެ އެއްވެސް ނަންބަރަކުން ދިވެހި ފުލުހުންގެ ޚިދުމަތުން ނުގުޅާނެކަމުގައި ވެސް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
