ކުޑަކުދިންގެ ދުވަހުގެ މުނާސަބަތުގައި "އުފާ ފެސްޓިވަލް"ގެ ނަމުގައި ކުޑަކުދީންގެ ހަވީރެއް ބޭއްވުމަށް އިޖްތިމާއީ އަދި އާއިލީ ތަރައްޤީއާއި ބެހޭ ވުޒާރާއިން ނިންމަވައިފިއެވެ.

އިޖްތިމާއީ އަދި އާއިލީ ތަރައްގީއާއި ބެހޭ ވުޒާރާއިން އިސްނަގައިގެން ބާއްވާ މި ހަރަކާތަކީ ހައުސިންގ ޑިވޮލޮޕްމެންޓް ކޯޕަރޭޝަން (އެޗް.ޑީ.ސީ) އާއި އުރީދޫއާ ވެސް ގުޅިގެން ބާއްވާ ހަރަކާތެކެވެ. މި މި ޚާއްސަ ހަވީރު ބޭއްވުމަށް ހަމަޖެހިފައިވަނީ މިމަހުގެ 10 އަދި 11 ވަނަ ދުވަހުގައެވެ.

"އުފާ ފެސްޓިވަލް" ކުރިއަށް ގެންދިޔުމަށް ނިންމަވާފައިވަނީ ހުކުރު އަދި ހޮނިހިރު ދުވަހުގެ 16:00 އިން 18:00 އަށް އަދި ރޭގަނޑު 20:00 އިން 22:00 އަށެވެ.

ފެސްޓިވަލްގައި ގިނަ ހަރަކާތްތަކެއް ބޭއްވުމަށް ވަނީ ނިންމާފައެވެ. އެގޮތުން ހުކުރު ދުވަހުގެ ހަވީރު، ތަފާތު ގޭމް ސްޓޯލްތަކާއި ކާބޯތަކެތީގެ ސްޓޯލްތަކުގެ އިތުރުން ރޮބޯމޭންގެ ހަރަކާތްތައް ފެނިގެންދާނެއެވެ. މީގެއިތުރުން ބައުންސިންގް ކާސަލް އަދި ތަފާތު މެސްކޮޓްތަކާއ، ރީޑިންގ ވިތް މިސް ޔޫލީ ކިޔާ ހަރަކާތެއްވެސް ހުކުރުދުވަހު ކުރިއަށް ގެންދިޔުމަށް ވަނީ ރާވާފައެވެ. އަދި އެމްއެންޑީއެފްގެ ފަޔަރ ޓްރަކް، އެމްޓީސީސީ ބަސް އަދި އެމްޕީއެލް ރީޗް ސްޓެކަރއަށް އަރާލުމުގެ ފުރުޞަތުވެސް ލިބިގެންދާނެއެވެ.

ހޮނިހިރު ދުވަހު ސްޓޯލްތަކުގެ ހަރަކާތަކުގެ ބަދަލުގައި ކުރިއަށް ގެންދަން ހަމަޖެހިފައިވަނީ ފެންކުޅީގެ ތަފާތު ހަރަކާތްތަކެވެ. މިގޮތުން ފޯމް ބައުންސިންގް އިންފްލޭޓެބަލްއާއި ބައުންސިންގެ ކާސަލްގެ އިތުރުން ފެން ޖެހުމުގެ ކުޅިވަރު އޮންނާނެއެވެ.

މީގެ އިތުރުން ހޮނިހިރު ދުވަހުގެ ރޭ 20:00 އިން 22:00 އަށް ވަރަށް ޚާއްސަ މޫވީ ނައިޓެއްވެސް ބޭއްވުމަށް ވަނީ ހަމަޖެހިފައެވެ. އަދި މި ޚާއްސަ ފެސްޓިވަލް ނިންމާލުމުގެ ގޮތުން ހަވާއެރުވުން ވެެސް އޮންނާނެކަމަށް އިޖްތިމާއީ އަދި އާއިލީ ތަރައްޤީއާއި ބެހޭ ވުޒާރާއިން ވިދާޅުވެއެވެ.