އިންޑިއާއިން ތަރައްޤީކުރަމުން އައި އުތުރުތިލަފަޅުގައި ކުރިން އިންޑިއާ ސިފައިން ތިބިކަން ލިޔެކިޔުންތަކުން ފެންނަކަމަށާއި، މިހާރު އެތަނުގައި އިންޑިއާ ސިފައިން ނެތްކަމަށް ދިފާއީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ރާއްޖޭގައި ތިބި އިންޑިއާ ސިފައިން އަނބުރާ ޤައުމަށް ފޮނުވައިލާ، އޭގެ ބަދަލުގައި އެ އަދަދަށް މަދަނީ މީހުން ގެނައުމާއި ގުޅޭ ގޮތުން މައުލޫމާތު ދިނުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އުތުރުތިލަފަޅުގައި އިންޑިއާ ސިފައިން ތިބިކަމަށް ބުނެ ކުރިން، ސަރުކާރަށް ތާއީދުކުރާ ފަރާތްތަކުން ދެއްކެވި ވާހަކަތަކަކީ ދޮގުތަކެއްކަމަށް ބުނެ، އެވާހަކަތައް ދެއްކެވި ފަރާތްތަކާއިމެދު ފިޔަވަޅު އަޅުއްވާނެ ތޯ ނޫސްވެރިޔަކު ވަނީ ސުވާލު ކޮށްފައެވެ.

އެ ސުވާލަކަށް ޖަވާބުދެއްވަމުން ޣައްސާން ވިދާޅުވީ، ކުރިން އެތަނުގައި އިންޑިއާ ސިފައިން ތިބި ކަމަށާ، އެކަން ލިޔެކިޔުން ތަކުން ސާފުވާ ކަމަށެވެ. އެހެން ނަމަވެސް މިހާރު އުތުރު ތިލަފަޅުފައި އިންޑިޔާ ސިފައިން ނުތިބޭނެކަން ޣައްސާން ވަނީ ތަކުރާރުކޮށް ވިދާޅުވެފައެވެ.  

Advertisement

މިއާއެކު ނޫސްވެރިއެއް ވަނީ އުތުރު ތިލަފަޅުގައި ތިބި ސިފައިންގެ އަދަދާއި އެމީހުން އުތުރުތިލަފަޅުގައި ތިބީ ހަތިޔާރާއެކުކަން ނުވަތަ ނޫންތޯ ސުވާލު ކޮށްފައެވެ.  

އެ ސުވާލަށއ ޖަވާބު ދެއްވަމުން ޣައްސާން ވިދާޅުވީ އެ ސިފައިން ގެނައީ ދެ ޤައުމުގެ މެދުގައި ހެދި އެއްބަސްވުމެއްގެ ދަށުން ކަމުގައިވާނަމަ އެ އެއްބަސްވުމުގައި ހިމެނޭ ބައެއް މައުލޫމާތު ހާމަކުރެވޭނީ ދެފަރާތުން އެއްބަސްވެގެން ކަމަށެވެ. 

"އެހެންވީމަ އަޅުގަނޑުމެން އެކަން އެގޮތަށް ފޮރިން މިނިސްޓްރީ މެދުވެރިކޮށް ބަލައިފައި އަޅުގަނޑުމެންނަށް ހާމަކުރެވޭ މައުލޫމާތެއް ހާމަކޮށްދޭނަން،" ވަޒީރު ވިދާޅުވިއެވެ.