މި އަހަރުގެ ޖެނުއަރީ މަހުން ފެށިގެން މެމްބަރުކަމުގެ މުސާރަ ނެންގެވުން ހުއްޓާލެއްވި ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ މައްޗަންގޮޅި މެދު ދާއިރާގެ މެމްބަރު މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ، ސްރީލަންކާގެ "ދަ މޯނިން"ނޫހަށް ދެއްވި އިންޓަވިއުއެއްގައި ވާހަކަފުޅު ދައްކަވަމުންނެވެ.

މިގޮތުން ރައީސް ނަޝީދު ވިދާޅުވީ، ކްލައިމެޓް ވަލްނަރަބަލް ފޯރަމްގެ ފުރަތަމަ ސެކްރެޓަރީ ޖެނެރަލްގެ މަގާމު ފުރުއްވަން ފެއްޓެވީ މިދިޔަ ފެބްރުއަރީ މަހުގައި ކަމަށާއި މި އަހަރުގެ ޖެނުއަރީ މަހު މެމްބަރު ކަމުގެ މުސާރަ ނެންގެވުން ހުއްޓާލެއްވި ކަމަށެވެ.

މީގެ އިތުރުންވެސް ރައީސް ނަޝީދު ވިދާޅުވީ، މުސާރަ ނުނެންގެވި ކަމުގައި ވިޔަސް މަޖިލިސް އާ ދައުރަކަށް ފެށެންދެން އެމަނިކުފާނަކީ އަދިވެސް ރައްޔިތުންގެ މަޖިލީހުގެ މެމްބަރެއް ކަމަށެވެ.

މިފަދައިން ވިދާޅުވި ނަމަވެސް ދާދި ފަހުން ރައީސް ނަޝީދު ވަނީ އޭޕްރިލް މަހާއި ދައުރުގެ ބާކީ އޮތް މުއްދަތުގެ މުސާރަ އުނިކޮށްދެއްވުމަށް އެދި މަޖިލީހުގެ ރައީސް މުޙައްމަދު އަސްލަމަށް ސިޓީއެއް ފޮނުއްވާފައެވެ.

މި ސިޓީގައި ރައީސް ނަޝީދު ވަނީ ކްލައިމެޓް ވަލްނަރަބަލް ފޯރަމް (ސީވީއެފް)ގެ ސެކްރެޓަރީ ޖެނެރަލްގެ ހައިސިއްޔަތުން ކުރަން ޖެހޭ މަސައްކަތްތަކަށް އެ މަނިކުފާނު ހުންނެވީ ގާނާގައި ކަމަށާއި އެ މަސައްކަތް އެމަނިކުފާނާއި ރަސްމީކޮށް ހަވާލުކުރުމަށް ހަމަޖައްސަންޖެހޭ ކަންކަން މާޗު މަހުގެ މެދުތެރޭގައި ގާނާގެ ޕާލިމެންޓުން ސީވީއެފް ސެކްރެޓްރިއޭޓްއާ ބެހޭ ގަރާރު ފާސްކޮށްފައިވާ ކަމަށް ވިދާޅުވެފައެވެ.

ނަވާރަ ވަނަ މަޖިލިހުގެ ފުރަތަމަ ރައީސް ކަން ނަޝީދު ކުރެއްވި އިރު އެ މަގާމުން އިސްތިއުފާ ދެއްވައި، ސީވީއެފް ގެ ސެކްރެޓަރީގެ މަގާމު ގަބޫލު ކުރައްވައި އެމަނިކުފާނުގެ ދިރިއުޅުއްވުން ގާނާ އަށް ބަދަލު ކުރެއްވީ މި އަހަރުގެ ޖެނުއަރީ މަހުއެވެ.

އޭގެ ފަހުންވެސް އެ މަނިކުފާނު މެމްބަރު ކަމުގެމުސާރަ ނަންގަވަމުން ގެންދަވާތީ ފާޑު ކިޔުންތައް އަމާޒުވެފައިވާއިރު، ރައީސް ނަޝީދުގެ ދިރިއުޅުއްވުން ގާނާއަށް ބަދަލުކުރެއްވިކަން މަޖިލީހަށް އަންގާފައިނުވާ ކަމަށް މި އަހަރުގެ ޖެނުއަރީ މަހުގެ ފަހުކޮޅު ރައްޔިތުންގެ މަޖިލީހުގެ އިދާރާއިން ވަނީ ބުނެފައެވެ.