ގުޅިފަޅު ހިއްކުމުގެ މަސައްކަތްތައް މަޑުޖައްސާލަން ހައި ކޯޓުން ނެރުނު ވަގުތީ އަމުރު ސުޕްރީމް ކޯޓުން ބާތިލްކޮށްފި އެވެ.

މިއަދު ސުޕްރީމް ކޯޓުން ކުރި ޙުކުމްގައިވަނީ ގުޅިފަޅު ހިއްކުން ހުއްޓާލުމަށް ހައިކޯޓުން ވަގުތީ ޢަމުރު ނެރެފައިވަނީ، ސުޕްރީމު ކޯޓުން ކަނޑައަޅާފައިވާ އުސޫލުތަކާ ޚިލާފަށް ކަމަށްވާތީ، މައްސަލަ ބެލި ފަނޑިޔާރުންގެ އިއްތިފާޤުން ހައިކޯޓުގެ އަމުރު، ބާތިލުކުރާ ކަމަށެވެ.

ގުޅިފަޅު ހިއްކުމުގެ މަސައްކަތް ހުއްޓާލުމަށް އެދި މައްސަލަ ހުށަހަޅާފައިވަނީ ތިމާވެށި ހިމާޔަތްކުރުމަށް ގޮވައިލާ އެކްޓިވިސްޓު ހުމައިދާ އަބްދުލްޣަފޫރެވެ. އެގޮތުން އޭނާ ފުރަތަމަ ވަނީ، ގުޅިފަޅު މަޝްރޫއު ހުއްޓުވުމަށް އެދި ސިވިލް ކޯޓަށް ހުށަހަޅާފައިވާ މައުޟޫއީ މައްސަލަ ވަކި ގޮތަކަށް ނިމެންދެން، އެ މަޝްރޫއު ވަގުތީ ގޮތުން ހުއްޓާލުމަށް އަމުރު ނެރެދިނުމަށް ސިވިލް ކޯޓުގައި އެދިފައެވެ. 

ނަމަވެސް ސިވިލް ކޯޓުން ނިންމާފައިވަނީ، ހުމައިދާ އަބްދުލްޣަފޫރު އެދުނު ފަދައިން ވަގުތީ އަމުރެއް ނެރެދެވޭނެ ތަނެއް ނެތް ކަމަށެވެ. އެހެން ކަމުން ހުމައިދާގެ ފަރާތުން ވަނީ ސިވިލް ކޯޓުގެ ނިންމުމަކީ ޤާނޫނީ އުޞޫލުތަކާ ޚިލާފު ނިންމުމެއް ކަމަށް ބުނެ، އެ މައްސަލަ ހައިކޯޓުގައި އިސްތިއުނާފު ކޮށްފައެވެ.

މި މައްސަލަ ހައިކޯޓުން ބެލުމަށް ފަހު، ވަނީ، ގުޅި ފަޅު ޕޯޓް ޑިވެލޮޕްމަންޓް މަޝްރޫއުގެ ބިން ހިއްކުމާ ގުޅޭ އެންމެހާ މަސައްކަތްތައް ވަގުތީ ގޮތުން ހުއްޓާލުމަށް ދައުލަތުގެ މައްޗަށް އަމުރުކޮށްފައެވެ. ނަމަވެސް ހައިކޯޓުން ނިންމި ނިންމުން ޤާނޫނީ އުޞޫލުތަކާ ޚިލާފުކަމަށް ބުނެ، ބަންޑާރަ ނައިބުގެ އޮފީހުން ވަނީ މައްސަލަ ސުޕްރީމު ކޯޓުގައި އިސްތިއުނާފުކޮށްފައެވެ.

މިއަދު ސުޕްރީމް ކޯޓުން މި މައްސަލައާ ގުޅިގެން، ހައި ކޯޓުން އިއްވި ޙުކުމް ބާޠިލުކުރަން ޙުކުމްކޮށްފައިވާއިރު، ސުޕްރީމުކޯޓުން މި ފަދައިން ޙުކުމް ކޮށްފައިވަނީ ހައިކޯޓުން ކުރި ޙުކުމްގެ ސަބަބުން ދައުލަތަށް ލިބުމުގެ އިޙްތިމާލު އޮތް ގެއްލުން ވަޒަންކޮށް އެއްހަމަ ކުރުމެއް ނެތި ޢަމުރު ނެރެފައިވާތީއެވެ.

އަދި ސުޕްރީމު ކޯޓުން ކުރި ޙުކުމުގައި ބުނެފައިވަނީ، ބިން ހިއްކުމުގެ އެ މަޝްރޫޢު ހުއްޓާލައިފިނަމަ، ދައުލަތަށް މާލީ ގޮތުން ބޮޑު ގެއްލުމެއް ވާނެކަންވެސް ކޯޓުން ފާހަގަ ކޮށްފައިވެއެވެ. އެއީ އެ މަސައްކަތް ކުރާ ކުންފުންޏާ އެކު ދައުލަތުން އެއްބަސްވެފައިވާ ގޮތުން މަޝްރޫއު ހުއްޓާލައިފި ނަމަ އައިޑަލް ޗާޖަސްގެ ގޮތުގައި ގަޑިއިރަކަށް 15،300 ޔޫރޯ ދައްކަން ޖެހޭތީ ކަމަށްވެސް ސުޕްރީމް ކޯޓުން ބުނެއެވެ.

ގުޅީފަޅު މަޝްރޫއަކީ ކުރީ ސަރުކާރުން ބޯހިޔާވަހިކަމުގެ މައްސަލަ ހައްލު ކުރުމަށް މާލޭ ރައްޔިތުންނަށް ގޯއްޗާއި ފްލެޓު ދިނުމަށް އަދި ސަރަހައްދީ ބަނދަރު ނުވަތަ ޕޯޓެއް ހެދުމަށް ހިއްކަން ފެށި ސަރަހައްދެކެވެ.

ނެދަލެންޑްސްގެ ބޮސްކާލިސް ކުންފުންޏަށް ދެ ބިލިއަން ރުފިޔާއަށް 65 ހެކްޓަރު ހިއްކާ ގޮތަށް ހަވާލުކުރެވުނު މި މަޝްރޫޢު އަށް އިތުރު 85 ހެކްޓަރު އިތުރު ކުރުމަށް ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ. 

ޕްލޭނިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވި ގޮތުގައި އެ މަސައްކަތް ހުއްޓާލާފައި އޮންނަ ކޮންމެ ދުވަހަކަށް ދައުލަތުން ބޮސްކާލިސް ކުންފުންޏަށް ތިން ލައްކައެއްހާ ޑޮލަރު ދައްކަންޖެހޭނެއެވެ.