ތ.ކަނޑޫދޫގައި ފާރެއްވެއްޓި ބޮޑެތި އަނިޔާތަކެއް ލިބުނު ކުއްޖާ އިތުރު ފަރުވާއަށް މާލެ ގެނެސްފިއެވެ.
ވިއްސާރަވެ، ވައިގަދަވުމުގެ ސަބަބުން އިއްޔެ ކަނޑޫދޫގައި 10 އަހަރުގެ ފިރިހެން ކުއްޖެއްގެ ގަޔަށް ފާރެއް ވެއްޓުމާއި ގުޅިގެން އެކުއްޖާ އަށް ވަނީ ބޮޑެތި އަނިޔާ ތަަކެއް ވެއްޓިފައެވެ.
ޑޮކްޓަރުންނާ ހަވާލާދީ އެރަށު މީހަކު ބުނި ގޮތުގައި މި ހާދިސާއާއި ގުޅިގެން ކުއްޖާގެ އެތެރެ ހަށްޓަށް ވެސް ވަނީ ވަރަށް ބޮޑަށް އަނިޔާވެފައެވެ.
މިކަމާއި ގުޅިގެން ކަނޑޫދޫ ކައުންސިލުގެ ރައީސް އަޙްމަދު ރީހާން ވިދާޅުވީ އިއްޔެ ހަވީރު ހިނގި މި ހާދިސާގައި ސީރިއަސް އަނިޔާތަކެއް ލިބިފައިވަނީ 10 އަހަރުގެ ފިރިހެން ކުއްޖަކަށްކަމަށާއި ކުއްޖާއަށް ލިބުނު އަނިޔާތަކަށް އިތުރު ފަރުވާ ދިނުމަށް މިއަދު ހެނދުނު މާލެ ގެނެސްފައިވާކަމަށެވެ.
ކުއްޖާގެ ގައިމައްޗަށް ވެއްޓުނީ ދުވަސްވީ ފާރެއް ކަމަށް ކަނޑޫދޫ ކައުންސިލުގެ ރައީސް ވިދާޅުވިއިރު، މިކަމާއި ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން ވެސް ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
