މޫސުން ގޯސްވެ އައްޑު އާއި ފުވައްމުލަކު ސިޓީ އަށް ނެރުނު އޮރެންޖް އެލާޓްގެ ވަގުތު އިތުރުކޮށްފި އެވެ.

މެޓް އޮފީހުން އައްޑޫއާއި ފުވައްމުލަކު ސިޓީއަށް ކުރިން އޮރެންޖު އެލާޓް ނެރެފައިވަނީ މިރޭ 7 ޖެހުމާ ހަމައަށެވެ. ނަމަވެސް މިހާރު އެލާޓްގެ ވަގުތު ވަނީ މިރޭ 11 އާއި ހަމައަށް އިތުރުކޮށްފަ އެވެ.

މެޓް އޮފީހުން ހާމަކޮށްފައިވާ ގޮތުގައި، މި ސިޓީތަކަށް ގަޑިއަކު 34 މޭލާއި 40 މޭލާއި ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 60 މޭލަށް ވައިގަދަވެ ކަނޑުތައް ވަރަށް ގަދަވާނެ ކަމަށް ލަފާ ކުރެވެއެވެ.

މީގެ އިތުރުން، މެޓް އޮފީހުން ހއ އާއި ރ އަތޮޅާއި ދެމެދުގައިވާ ރަށްތަކަށް ހުދު ސަމާލު އަދި ބ އަތޮޅުން ފެށިގެން އައްޑޫ ސިޓީ އާއި ހަމައަށް ރީނދޫ ސަމާލު ވެސް ވަނީ ނެރެފައެވެ. އަދި މިއަދު ހަވީރު 18:00 އާއި ހަމައަށް ރާއްޖޭގެ އެކި ހިސާބުތަކަށް ވިއްސާރަ ކުރުމާއިއެކު ގުގުރާނެ ކަމަށާއި ބައެއް ރަށްތަކަށް ބޯކޮށް ވާރޭ ވެހުން އެކަށީގެންވާ ކަމަށް މެޓް އޮފީހުން ބުނެފައިވާއިރު، ކަނޑުތައް އާއްމުގޮތެއްގައި ގަދަވާނެ ކަމަށްވެސް އެއިދާރާއިން ލަފާ ކުރެއެވެ.

މޫސުން ގޯސްވެ، ދިޔަވަރު ބޮޑުވާ ވަގުތުތަކުގައި ބައެއް ހިސާބުތަކަށް އުދައިގެ އަސަރު ކުރުމުގެ ފުރުސަތު އޮތުމާއި އެކު، ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސް ކުރައްވާފައެވެ.