ދިވެހި ބަހުގެ އެކަޑަމީގެ ބަސް ކޮމިޓީން “ޕޮއެޓްރީ ތެރަޕީ” އަށް ދިވެހި ބަހުން ކިޔާނެ ނަމެއް ކަޑައަޅައި އެ ނަން ފާސްކޮށްފިއެވެ. 

ބަސްކޮމިޓީން ނިންމާފައިވަނީ “ޕޮއެޓްރީ ތެރަޕީގެ” ގެ ދިވެހި ނަމަކީ “ޅެން ފަރުވާ” ކަމަށެވެ. 

އަދި ދިވެހި ބަހުގައި އެ ނަމުގެ މާނައަކީ، “ބަލި މީހާގެ އިހްސާސްތަކާއި އުދާސްތަކާއި ގުޅޭ ޅެން ހެދުމާއި، ކިޔުމާއި އަޑުއެހުމުގެ ތެރެއިން ނަފުސަށް ގެނެސްދޭ ތަސައްލީއެއް. މިއީ ގަދީމީ ޒަމާނުއްސުރެ ހަޟާރާތްތަކުގައި ނަފުސީ ތަފާތު ބަލިތަކަށް ފަރުވާ ދިނުމުގައި ބޭނުން ކުރަމުން އަންނަ ތަރީގާއެއް” ކަމަށް ބަސްކޮމިޓީގެ ނިންމުމުގައިވެއެވެ.

މިނަން މިހާރު ވަނީ ބަސްފޮތުގެ އޮންލައިން އިސްދާރުގައިވެސް ހިމަނާފައެވެ. 

މިއާއެކު ޅެން ފަރުވާގެ އިލްމީ ދިރާސާތަކުގެ މަސައްކަތް ކުރިއަށް ގެންދިޔުމަށް ދިވެހި ބަހާއި ތަރިކައާއި ބެހޭ ވުޒާރާއާއި ދިވެހިރާއްޖޭގެ ގައުމީ ޔުނިވާސިޓީއާއިމެދު އެކުލަވާލެވުފައިވާ ފަހުމާނާގައި ސޮއި ކުރުން މިމަހު 22 ވަނަ ދުވަހު ބޭއްވުމަށް ހަމަޖެހުފައިވާ ކަމަށް ދިވެހި ބަހާއި ބެހޭ ވުޒާރާއިން ބުނެފައިވެއެވެ.

ދިވެހި ބަހާއި ބެހޭ ވުޒާރާއިން ބުނެފައިވާ ގޮތުން، މި ފަހުމާނާގެ ދަށުން ޅެން ފަރުވާއާއި ބެހޭ އިލްމީ ދިރާސާތައް ކުރުމާއި ދިވެހި ޅެން ބޭނުން ކޮށްގެން ނަފްސީ ތަފާތު ބަލިތަކަށް ދެވިދާނެ ފަރުވާގެ މިންވަރާއި ތަފާތު ބަލިތަކަށް ފަރުވާ ދިނުމުގައި ގެންގުޅޭނެ އުސްލޫބުތަކުގެ މައއޗަށް ދިރާސާ ކުރެވިގެންދާނެ އެވެ.   

މީގެ އިތުރުން، ދިވެހިބަސް ކުރިއެރުވުމަށް ކުރެވޭ މަސައްކަތް ތަކަށް ބޭނުންވާ  ތަފާތު އެހެނިހެން ދިރާސާތައް ކުރުންވެސް މި ފަހުމާނާގެ ދަށުން ކުރުމަށް ހަމަޖެހުފައުވާ ކަމަށް އެ ވުޒާރާއިން ބުނެފައިވެއެވެ. 

ދިވެހި ޅެންވެރިކަން ބޭނުން ކޮށްގެން ނަފްސާނީ ހާލަތްތަކަށް ފަރުވާ ދެވޭތޯ ބެލުމުގެ ދިރާސާއެއް ކުރައްވާނެ ކަމަށް ދިވެހި ބަހާއި ޘަގާފަތާއި ތަރިކައާއި ބެހޭ ވުޒާރާގެ ވަޒީރު އާދަމް ނަސީރު އިއުލާން ކުރެއްވީ ޅެންވެރިންގެ ދުވަސް ފާހަގަކުރުމަށް ތިނަދޫގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

އެގޮތުން ޅެންވެރިކަމާއި ބަހުގެ އެފަދަ ފަންނުތަކުން ދުނުޔޭގެ ކުރިއަރާފައިވާ މުޖުތަމަޢު ތަކުގައި ހިފާ އިލްމީ ބޭނުންތައް ދިވެހި ބަހުން ދިވެހިންގެ ތެރޭގައިވެސް އޮތުމަކީ މުހިންމު ކަމެއް ކަމަށް ވަޒީރު ވިދާޅުވެފައިވެއެވެ.

ދިވެހި ބަހުގެ ވުޒާރާއިން ބުނެފައިވާ ގޮތުން ޅެން ފަރުވާ ކުރިއަށް ގެންދިޔުމަށްޓަކައި ދާއިރާގެ ފަންނީ ބޭފުޅުންނާއެކު ވަނީ މަޝްވަރާ ކުރެވިފައެވެ. އެގޮތުން، ސޮސައިޓީ ފޯ ހެލްތު އެޑިޔުކޭޝަން، މެންޓަލް ހެލްތު ސެންޓަރ، ޗައިލްޑް ޑިވޮލަޕްމަންޓް ސެންޓަރ އަދި ދަމަނަވެށީގެ ފަންނީ ބޭފުޅުންނާ މަޝްވަރާ ކުރެވިފައިވާ ކަމަށް ބުނެފައިވެއެވެ.