އީރާނުގެ ރައީސް އިބްރާހީމް ރައީސީ އަވަހާރަވުމާއި ގުޅިގެން އެގައުމުގެ ކެބިނެޓްގެ ކުއްލި ބައްދަލުވުމެއް ބާއްވައިފިއެވެ.

އީރާނުގެ ރައީސް އިބްރާހީމް ރައީސީ އަވަހާރަވެފައި ވަނީ އޭނާ ދަތުރުކުރެއްވި ހެލިކޮޕްޓަރު ވެއްޓި، ހިނގި ހާދިސާއެއްގައެވެ.

ރައީސީ އަވަހާރަވުމާއި ގުޅިގެން ނާއިބުރައީސް 1، މުހައްމަދު މޮޚްބަރު އިސްވެ އިންނަވައި މިއަދު ހެނދުނުގެ ވަގުތެއްގައި ވަނީ ކުއްލި ބައްދަލުވުމެއް ބާއްވާފައެވެ. 

އެ ބައްދަލުވުމަށްފަހު ކެބިނެޓުން ނެރުނު ބަޔާނެއްގައި ވަނީ، ރައިސީއާއެކު ދަތުރުކުރެއްވި އެޤައުމުގެ ޚާރިޖީ ވަޒީރު ހުސައިން އަމީރު އަބްދުالله ހިޔާންއާ، އިރުމަތީ އަޒަރުބައިޖާން ޕްރޮވިންސްގެ ގަވަރުނަރު މަލިކް ރަހުމަތީ އަދި ތަބްރީޒް މިސްކިތުގެ އިމާމް އާޔަތުالله އަލްހާޝިމީގެ އާއިލާއަށް ތައުޒިޔާ ފޮނުވާފައެވެ. 

އަދި ރައީސީ އަކީ ހީވާގި، މަސައްކަތްތެރި ބޭފުޅެއްކަމަށާ، އޭނާ އަކީ ގައުމީ މަސްލަހަތު އިސް ކުރައްވައި، ގައުމުގެ ކުރިއެރުމަށް މަސައްކަތް ކުރެއްވި ބޭފުޅެއް ކަމަށްވެސް ވަނީ ބުނެފައެވެ. 

މީގެ އިތުރުން، ރައީސީ ފެއްޓެވި މަސައްކަތް ހުއްޓުމެއްނެތި ކުރިއަށް ގެންދާނެ ކަމަށާ ގައުމު ހަލުއި ދުވެލީގައި ކިރިއަށް ގެންދިޔުމުގެ މަސައްކަތް ކުރިއަށް ދާނެ ކަމަށްވެސް ބުނެފައިވެއެވެ. 

ރައީސީ އަވަހާރަބެފައިވާއިރު އިރާނުގެ ޤާނޫނު އަސާސީގައި ބުނެފައި ވާގޮތުން ކުއްލި ޙާލަތެއްގައި އެ ޤައުމުގެ ރައީސް އަވަހާރަ ވެއްޖެ ނަމަ، ސުޕްރީމް ލީޑަރުގެ ހުއްދައާއެކު ވެރިކަމާ ހަވާލުވާނީ 1 ވަނަ ނައިބު ރައީސެވެ.

އީރާނުގެ ސިޔާސީ ދަރަޖަތައް ބަހާފައި އޮންނަ ގޮތުން އެ ދައުލަތުގެ ވެރިޔަކީ ސުޕްރީމް ލީޑަރު އަލީ ޚާމަނާއީ އެވެ. އަދި ރައީސް ބެލެވޭނީ ސަރުކާރުގެ ދެވަނަ ކޮމާންޑުގެ ގޮތުގަ އެވެ. 

އަދި ކުއްލި ޙާލަތެއްގައި ރައީސް އަވަހާރަ ވެއްޖެ ނަމަ، 1 ވަނަ ނައިބު ރައީސް ވެރިކަމާ ހަވާލުވެ، 50 ދުވަހުގެ ތެރޭގައި، އާ ރައީސަކު އިންތިޚާބު ކުރަން ޖެހެއެވެ.