އިޖުތިމާއީ ޙާރަކާތްތަކަށް އެހީވާން ބީއެމްއެލް އިން ''ބޭންކް ފަންޑް'' ތަޢާރަފުކޮށްފިއެވެ.

ބޭންކް އޮފް މޯލްޑިވްސް (ބީއެމްއެލް) އިން މިއަދު ތަޢާރަފުކުރި ބޭންކް ފަންޑަކީ ދެމެހެއްޓެނިވި އަދި އާ މަޝްރޫއުތަކެއްގެ ތެރެއިން ލޯކަލް އެންޖީއޯތައް މުޖުތަމައުގައި ބާރުވެރިކުރުވުމަށް ދޭން ނިންމާފަ ފަންޑެކެވެ.

މި ފަންޑުގެ ދަށުން ކޮންމެ އަހަރަކުވެސް 4 ދާއިރާއަކުން 5 ދެމެހެއްޓެނިވި މަޝްރޫއެއް ހޮވާ، އެ މަޝްރޫއުތަކަށް ހިލޭ އެހީ ދޭން ވަނީ ނިންމާފައެވެ. އެ ގޮތުން މި ފަންޑު ދޫކުރަން ހަމަޖެހިފައިވާ ދާއިރާ ތަކަކީ:

- ތައުލީމީ ދާއިރާ

- ތިމާވެށި

- ކުޅިވަރު

- މުޖުތަމައަށް ފައިދާކުރާ އެހެނިހެން ދާއިރާތައް

ކޮންމެ އަހަރަކުވެސް ހޮވާލެވޭ 5 މަޝްރޫޢަށް ވަނީ، 200،000 ރުފިޔާ ދޭން ނިންމާފައެވެ.

މި ފަންޑު ހޯދުމަށް، ލޯކަލް ނޮން-ގަވަރމެންޓް އޯގަނައިޒޭޝަންތަކަށާއި، ކޮމިއުނިޓީ ބޭސްޑް އޯގަނައިޒޭޝަން ތަކަށް ވަނީ، ޕްރޮޕޯސަލް ހުށަހަޅަން ހުޅުވާލާފައެވެ. ޕްރޮޕޯސަލް ހުށަހެޅޭނީ ބޭންކް އޮފް މޯލްޑިވްސްގައި ބޭންކް އެކައުންޓެއް އޮންނަ ނުވަތަ ޕްރޮޖެކްޓު ލިބުމުގެ ކުރިން، ބޭންކް އެކައުންޓެއް ހުޅުވުމަށް އެދި ހުށަހަޅާފައިވާ ފަރާތަކަށް އެކަންޏެވެ.

ވަކި ވަކި ފަރުދުންނާއި، ދައުލަތުގެ ޚަރަދުގައި ހިންގާ ޖަމިއްޔާތަކާއި، ސަރުކާރުގެ އިދާރާތަކާއި ވިޔަފާރި ކުންފުނިތަކަކަށް މި ފަންޑަށް ހުށަހެއްނޭޅޭނެއެވެ. ނަމަވެސް ބޭންކް އޮފް މޯލްޑިވްސްގެ މުވައްޒަފުންނާއި އެމީހުންގެ ގާތް އާއިލާގެ މެމްބަރުންނަށް މި މި ފަންޑަށް ހުށަހެޅުމުގެ ފުރުސަތެއް ނުލިބެއެވެ.

ބޭންކް ފަންޑަށް އެދި ހުށަހެޅުމުގެ ސުންގަޑިއަކީ 10 ޖޫން 2024ގެ ރޭގަނޑު 11:00 އެވެ. އެ ފަންޑަށް އެދި ހުށަހަޅަންޖެހޭ ފޯމާއި ޕްރޮޕޯސަލް އީމެއިލް މެދުވެރިކޮށް [email protected] އަށް ހުށަހެޅޭނެއެވެ.