ރައްޔިތުންގެ މަޖިލީހުގެ ރައީސްގެ މަގާމަށް ފޮނަދޫ ދާއިރާގެ މެންބަރު އަދި، ރައީސުލްޖުމްހޫރިއްޔާގެ ސްޕެޝަލް އެޑްވައިޒަރ އަބްދުއްރަހީމް އަބްދުالله ހަމަޖެއްސެވުމާއިއެކު ބައްޕާފުޅަށް މަރުހަބާ ދަންނަވައި، އެ މަގާމަށް ވަޑައިގެންނެވުމަށް ކުރެއްވި ދަތުރުފުޅު، ދަރިކަލުން އަދި ޓޫރިޒަމް މިނިސްޓަރ އިބްރާހިމް ފައިސަލް ކިޔައިދެއްވައިފިއެވެ.

މަޖިލީހުގެ ރައީސްގެ މަގާމަށް ޕީއެންސީގެ ޗެއަރޕާސަންގެ މަގާމުވެސް ފުރުއްވަމުންދާ އަބްދުއްރަހީމް ހަމަޖެއްސެވީ ރައީސުލްޖުމްހޫރިއްޔާ ޑރ މުހައްމަދު މުޢިއްޒެވެ. އެނިންމުން ނިންމެވީ އިއްޔެ ޕީއެންސީގެ އިންތިޚާބީ މެންބަރުންނާއެކު ބޭއްވުނު ބައްދަލުވުމުގެ ތެރެއިންނެވެ.

އެކަމާއި ގުޅިގެން ފައިސަލް ފޭސްބުކުގައި ކުރެއްވި ޕޯސްޓެއްގައިވަނީ، މާތް الله އަށް ޙަމްދާއި ޝުކުރު ކުރައްވައި، ބައްޕާފުޅު، ޢަބްދުއްރަހީމް ޢަބްދުއްالله 20 ވަނަ ރައްޔިތުންގެ މަޖިލީހުގެ ރައީސް ކަމުގައި ކަނޑައަޅައިދިނުމަށް ޕީއެންސީ ގެ އިންތިޚާބީ މަޖިލީސް މެމްބަރުންގެ އަރިހުގައި ޕާޓީގެ ރައީސް، ރައީސް ޑރ މުޙައްމަދު މުޢިއްޒު އެދިވަޑައިގެން އެ ބޭފުޅުން އެކަމަށް އިއްތިފާޤުވެ ނިންމެވުމުން މަރުހަބާ ދަންނަވާފައެވެ.

އަދި އެކަމަށްޓަކައި ރައީސް ޑރ މުޢިއްޒަށް ޝުކުރު ދަންނަވައި ހެޔޮދުޢާ ކުރައްވާފައެވެ. 

“އަހުރެންގެ ބައްޕައަކީ ހަމަ އާދަޔާއި ޚިލާފު އިންސާނެކެވެ. ނުހަނު ނިކަމެތިހާލު، ކިޔަވުމުގެ ބޭނުމުގައި މާލެފައިބާ ގެއެއްގެ ނޯކިރީކޮށް، އެތަކެއް ތަކުލީފުތައް ތަހައްމަލު ކޮށް، ނޫކަށި ޒުވާން ޢުމުރުގައި ވަޒީފާއަށް ނިކުމެ، ދުނިޔެ އާރާސްތުކުރުމަށް ނުހަނު ޒުވާން ޢުމުރު ޒަވާޖީ ހަޔާތެއް ފަށާ، ޢާއިލާއެއް ބިނާކޮށް، އުފަންވި އަތޮޅާއި ރަށަށް ޚިދުމަތްކޮށް، ކުޑަމިނުން ރަށްކުރިއަރުވާ ކޮމެޓީ އަށް ކުރިމަތިލައި ނުހޮވުމުންވެސް ހިތްވަރު އެލުވާނުލާ، ފަހަތަށް ފިޔަވަޅެއް ނާޅާ، ނުހަނު ވަރުގަދަ ޢަޒުމާ ގަދަ ހިތްވަރާއި އެކު ކުރިއަށް ދިޔަ އިންސާނެކެވެ.” އަބްދުއްރަހީމްގެ ދަތުރުފުޅު ފެށި ކުރިއަށް ދިޔަގޮތް ކިޔައިދެއްވަމުން ފައިސަލް ލިޔުއްވާފައިވެއެވެ. 

މިއާއެކު ފައިސަލް ވިދާޅުވީ، ބައްޕާފުޅު އަބްދުއްރަހީމް، ދިވެހި ޤައުމަށް ޚިދުމަތް ކުރުމުގައި، “ވެރީންނަށް ކިޔަމަންތެރިކަމާއެކު ލައްބައޭ ބުނެ 24 ގަޑިއިރު މަސައްކަތުގައި” އުޅުއްވަނިކޮށް، ވެރިންގެ އަމުރަށް “އެންމެ ފަހަރަކު ނޫނެކޭ ބުނުމުން ސިޔާސީ ރޭވުމުން ވައްކަން ބޮލުގައި އަޅުވާ”  އަރުވާލި ކަމަށެވެ.

މިއާއެކު ފައިސަލް ވިދާޅުވީ، ޤައުމަށް އައި ސިޔާސީ ބަދަލުގެ އޮއިވަރާއެކު، ނެގި ގިނަ ރާޅުތަކުގެ ތެރެއިން ރައްޔިތުންގެ ހައްޤުތަކާއި ޤައުމުގެ ހެވަށްޓަކައި  އަބްދުއްރަހީމް ނުކުންނެވި ކަމަށާ، ސިޔާސީ ޕާޓީގެ ހަރަކާތްތަކުގައި ބައިވެރުވެވަޑައިގެން، 2009 ވަނަ އަހަރު އިންތިޚާބު ކުރި 17 ވަނަ ރައްޔިތުންގެ މަޖިލީހުން ބައްޕާފުޅު ޖާގަ ހޯއްދެވީ “ސިޔާސީ ވިޔަ ކުރުން ހަމަ ރަނގަޅަށް” ދަންނާތީ ކަމަށެވެ.

މީއާއެކު، ޑީއާރުޕީ، ޕީއޭ، ޕީޕއެމް ގެ ވެރީންނާއި، އެޒަމާން ތާރީޚުގައި ލިޔެވިފައިވާކަން ފާހަގަކުރައްވައި ފައިސަލް އިތުރަށް ވިދާޅުވީ، ޕީއެންސީގެ ރައީސްގެ މަގާމުގައި ހުންނަވައި، 2023 ވަނަ އަހަރު ބޭއްވި ރިޔާސީ އިންތިޚާބު، އޭރު އިދިކޮޅުގައި އޮތް ޕީޕީއެމް ޕީއެންސީ ކޯލިޝަނަށް ކާމިޔާބު ކުރުމަށް މިއަދުގެ ރައީސް ޑރ މުޢިއްޒު ރިޔާސީ ރޭހަށް ނެރުއްވާ، އިންތިޚާބު ބޮއިކެޓު ކުރުމަށް ރޭވި “ކެހިވެރި ރޭވުމުން” ޕާޓީއާއި މި ޤައުމު ސަލާމަތް ކުރުމުގެ ހިތްވަރުގަދަ ފިޔަވަޅު އެޅުއްވީ އޭނާގެ ބައްޕަ ކަމަށެވެ.

އަދި އެއީ މަދުން ނޫނީ އިންސާނަކަށް ނުނެރެވޭނޭ ފަދަ ހިތްވަރުގަދަ ޢަމަލެއް ކަމަށާ މިއަދު މި ޤައުމު ދެކެމުން މިދަނީ އުފާވެރި މަންޒަރެއް ކަމަށްވެސް ފައިސަލް ކަމަށެވެ.

ފައިސަލް ވިދާޅުވީ މިއަދު އޭނާގެ ބައްޕައަކީ 20 ވަނަ މަޖިލީހުގެ ރައީސް ގެ މަޤާމަށް މެންބަރުން އިންތިޚާބު ކުރާނޭ އެމަޖިލީހުގެ ރައީސް ކަމަށްވާއިރު އެއީ ބައްޕާފުޅު ތާރީޚުން ހޯއްދެވި ފިސާރި ވަރުގަދަ ޖާގައެއް ކަމަށެވެ. އެކަމަށްޓަކައި، ހެޔޮ އެދޭ އެކުވެރީންނާއާއި، އާއިލާ އާއި، ލ އަތޮޅާއި ޚައްޞަ ކޮށް ލ ފޮނަދޫ ފަޚުރުވެރިވާނޭ ކަމަށްވެސް ވިދާޅުވިއެވެ.

ފައިސަލް ވިދާޅުވީ މިއީ ނުހަނު އުފާވެރި ހިނދުކޮޅެއް ކަމަށާ، މިހިނދުކޮޅުގައި ބައްޕާފުޅުގެ ކާމިޔާބީ ލޮލުން ދެކި އަތުން ހިފަން ލިބުމަކީ ދޮށީ ފިރިހެން ދަރިއަކަށް ލިބޭނޭ ކޮންފަދަ ބޮޑު ފަޚުރުވެރިކަމެއް ކަން ބަޔާން ކޮށްދޭނެ ގޮތެއްވެސް އެނގިނުލައްވާ ކަމަށެވެ.

“ބައްޕާއެވެ! އައްސަރިބަހާއި ސާބަހެވެ. ތިޔަ ކުރެއްވި ހިތްވަރާއި ތިޔަވީ ޤުރުބާނީ އަށް އަދި ތިޔަ ހޯއްދެވި ކާމިޔާބީ އަށް ފަށްފަށުން ސެލިއުޓް ކުރަމެވެ. ރައީސް މުޢިއްޒު އަށާއި ދިވެހި ލޮބުވެތި ރައްޔިތުންނަށް ނުހަނު އަދަބުވެރިކަމާ އެކު ޝުކުރުދަންނަވަމެވެ. ފޮނަދޫ ދާއިރާ ގެ ލޮބުވެތި ރައްޔިތުންނަށް ހިތުގެ ފުންމިނުން ޝުކުރުދަންނަވަމެވެ.” ފައިސަލްގެ ޕޯސްޓް ނިންމަވާލައްވަމުން ވިދާޅުވެފައިވެއެވެ.