މާލީ ބަޔާން ހުށަނާޅާ މީހުންނާމެދު ފިޔަވަޅު އަޅާނެކަމަށް ފުއާދު ތައުފީޤު ވިދާޅުވެއްޖެއެވެ.

މިއަދު އެކްސްގައި ކުރެއްވި ޕޯސްޓެއްގައި އިލެކްޝަންސް ކޮމިޝަނުގެ ޗެއަރމަން ފުއާދު ތައުފީޤު ވިދާޅުވީ މާލީ ބަޔާން ހުށަނާޅާ މީހުންނާމެދު ޤާނޫނުގައިވާ ގޮތަށް ޢަމަލުކުރާނެ ކަމަށެވެ.

https://twitter.com/fuwadthowfeek/status/1794373546971742497?s=46&t=Tj-_47fWMsad04xOFjp11A

Advertisement

މިދިޔަ ބުދަ ދުވަހު އިލެކްޝަންސް ކޮމިޝަން (އީސީ) އިން ހާމަކުރެއްވި ގޮތުގައި ރައްޔިތުންގެ މަޖިލީހުގެ އިންތިޚާބުގައި ވާދަކުރި 368 ކެންޑިޑޭޓުންގެ ތެރެއިން އަންގާރަ ދުވަހުގެ ރޭގެ ނިޔަލަށް މާލީ ބަޔާން ހުށަހެޅީ 186 ކެންޑިޑޭޓުންނެވެ.

މާލީ ބަޔާން ހުށަހަޅަން، ގާނޫނުގައިވާ ގޮތުގެ މަތިން އިލެކްޝަންސުން ދިން މުއްދަތު ވަނީ މިދިޔަ އަންގާރަ ދުވަހުގެ މެންދަމު 12 ގެ ނިޔަލަށް ހަމަވެފައެވެ.

އެ މުއްދަތު ހަމަވިއިރު މާލީ ބަޔާން ހުށަހަޅާފައިވަނީ އަމިއްލަ ގޮތުން ވާދަކުރެއްވި 59 ކެންޑިޑޭޓުންނާއި ޕާޓީތަކުން ވާދަކުރި 127 ކެންޑިޑޭޓުން ކަމަށް އީސީން މައުލޫމާތުދެއެވެ. އެހެންކަމުން މުއްދަތު ހަމަވިއިރު، މާލީ ބަޔާން ހުށަނާޅާ 182 ކެންޑިޑޭޓުން ތިއްބެވެ.

މަޖިލިސް އިންތިޚާބުގައި ވާދަކޮށް ނުހޮވުނު ނަމަވެސް އިންތިޚާބުގައި ވާދަކުރާ ހުރިހާ ކެނއޑިޑޭޓުން މާލީ ބަޔާން ހުށަހަޅަން ޖެހެއެވެ. އީސީން ދީފައިވާ މުއްދަތުގައި މާލީ ބަޔާން ހުށަހަޅާފައި ނުވާނަމަ ނުވަތަ މާލީ ބަޔާނުގައި ދޮގު މައުލޫމާތު ހިމަނާފައިވާނަމަ އެއް އަހަރު ދުވަހުގެ ޖަލު ހުކުމެއް ނުވަތަ 72،000 ރުފިޔާގެ ޖޫރިމަނާއެއް އަންނާނެ އެވެ.