ޗައިނާގެ ޗެމްބަރ އޮފް ކޮމާސްއިން ހަދިޔާ ކުރި ފިޔާ ބަހާ ނިންމާލައިފިއެވެ.

ޗައިނާގެ ޗެމްބަރ އޮފް ކޮމާސް އިން ހަދިޔާ ކުރި ފިޔާ ބެހުމުގެ މަސައްކަތުގައި އިސްކޮށް ހަރަކާތްތެރިވި ޖަމިއްޔާ 'ދަ ކޮމޮނާސް' އިން މައުލޫމާތު ދިން ގޮތުގައި، ފިޔާ ބެހުމުގެ މަސައްކަތް މިހާރު ވަނީ ކާމިޔާބު ކަމާއެކު ނިންމާލެވިފައެވެ.

ހުޅުމާލެ ދެވަނަ ފިޔަވަހީގެ ހިޔާ ސަރަހައްދުގައި ފިޔާ ބެހުމުގެ މަސައްކަތް ފަށާފައިވަނީ މިއަދު ހެނދުނު 09:00 ގައެވެ. އަދި މިއަދުގެ އިރުއޮއްސުމާ ހަމައަށް ފިޔާ ބެހުމުގެ މަސައްކަތް މުޅިން ނިންމާލާފައިވާއިރު، ޖުމުލަ 44 ޓަނުގެ ފިޔާ، 7000 އަށް ވުރެ ގިނަ މީހުންނަށް ވަނީ ފޯރުކޮށްދީފައެވެ.

Advertisement

ދަ ކޮމޮނާސް އިން އިތުރަށް މައުލޫމާތު ދިން ގޮތުގައި، މިއަދު ފިޔާ ބަހާފައިވަނީ، ވަކި ފްލެޓެއްގެ ވަކި ބަޔަކަށް ނުބަލާ، ހުޅުމާލޭ ދެވަނަ ފިޔަވަހީގެ ހުރިހާ ރައްޔިތުންނަށެވެ.

ފިޔާ ބެހުމުގެ މި ބޮޑު ޙަރަކާތް ނިންމާލުމުގެ ރަސްމިއްޔާތެއް މި މަހުގެ 29 ވަނަ ދުވަހު ސަލާހުއްދީން ސުކޫލުގައި ބޭއްވުމަށް ވަނީ ރާވާފައެވެ. މި ރަސްމިއްޔާތުގައި، ޗައިނާގެ އެމްބަސީގެ އިތުރުން، ޗެމްބަރ އޮފް ކޮމާސް އިންވެސް ބައިވެރިވާނެއެވެ.

ކުރިއަށް އޮތް ތަނުގައިވެސް، މި ފަދަ ޙަރަކާތްތައް ހިންގާނެކަން ފާހަގަކުރަމުން ދަ ކޮމޮނާސް އިން ބުނީ، ހުޅުމާލެ ދެވަނަ ފިޔަވަހީގައި މިފަދަ ޙަރަކާތްތައް ހިންގުމަށް ފަހި ފުރުސަތުތަކެއް ލިބިގެންދާނެ ކަމަށް އުންމީދު ކުރާ ކަމަށެވެ.

ދަ ކޮމޮނާސްއަކީ ޢާންމުންނާއި ގުޅުންހުރި ކަންކަމުގައި ޢާންމުންގެ ފަރާތުން ވަކާލާތުކުރަމުންދާ ޖަމްޢިއްޔާއެކެވެ. ހަހާހަށްވުރެ ގިނަ މެންބަރުން ހިމެނޭ މި ޖަމްޢިއްޔާ މަޝްހޫރުވެފައިވަނީ ކޮތަރުކޮށި ޖަމިއްޔާގެ ނަމުންނެވެ. މި ޖަމްޢިއްޔާއަކީ ދިވެހި ރާއްޖޭގައި ބޮޑުވެފައިވާ ގެދޮރުވެރިކަމުގެ މައްސަލައިގައި އެންމެ ބޮޑަށް އަޑުއުފުލާ ޙަރަކާތްތެރިވަމުން ދާ ޖަމްޢިއްޔާކަންވެސް ފާހަގަކޮށްލެވެއެވެ.