ދިވެހިރާއްޖޭގެ މަސްވެރިކަން ކުރިއެރުވުމަށް ޗައިނާއާއެކު މަޝްވަރާކޮށްފިއެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މިއަދު ހާމަ ކުރެއްވި ގޮތުގައި ވަޒީރު ޝިޔާމާއި ވުޒާރާގެ އިސް އޮފިޝަލުން، ރާއްޖޭގައި ހުންނަވާ ޗައިނާގެ ސަފީރު ވަންގް ލިކްސިން އާއި ޗައިނާގެ ފުޖިއަން ޕްރޮވިންސްގެ ޑިޕާޓްމަންޓް އޮފް އޯޝަން އެންޑް ފިޝަރީޒް ރިސޯސަސްގެ އިސް އޮފިޝަލުންނާއެކު ވަނީ މަޝްވަރާ ބައްދަލުވުމެއް ބާއްވާފައެވެ.

މިއަދު ބޭއްވި ބައްދަލުވުމުގައި ރާއްޖޭގެ މަސްވެރިކަމާއި ކަނޑުގެ ވަސީލަތްތައް ތަރައްޤީކުރުމާ ގުޅޭ ގޮތުން ވަނީ މަޝްވަރާކޮށްފައެވެ.

މި ބައްދަލުވުމުގައި ވަޒީރު ޝިޔާމް ވަނީ މަސްވެރިކަމުގެ ސިނާޢަތުގައި ވުޒާރާގެ ހުނަރާއި ޢިލްމު އިތުރުކުރުމަށްޓަކައި ކެޕޭސިޓީ ބިލްޑިންގ، މެރިކަލްޗަރ، އަދި އެކްސްޕްލޮރޭޓަރީ ފިޝިންގ އަށް އެއްބާރުލުން ދިނުމަށް ޝައުޤުވެރިކަން ފާޅުކުރައްވާފައެވެ.

މީގެ އިތުރުން ރާއްޖޭގައި މަސް ބަންދުކުރުމުގެ ސިނާޢަތުގައި ބަދަލުކުރުމަށް ސަރުކާރުން އިސްކަންދޭ ކަންކަން ވަޒީރު ވަނީ ފާހަގަކުރައްވައި ޗައިނާގެ އިންވެސްޓްމަންޓްތަކަށް މަރުހަބާ ވިދާޅުވެފައެވެ.

މިއަދުގެ ބައްދަލުވުމުގައި ޗައިނާގެ ފުޖިއަން ޕްރޮވިންސްގެ އިސް އޮފިޝަލުން ބައިވެރިވެލެއްވި އިރު، ފުޖިއަން ޕްރޮވިންސަކީ މަސްވެރިކަމާއި ކަނޑުގެ ވަސީލަތްތައް ތަރައްޤީކުރުމުގެ ދާއިރާއިން އެންމެ ކުރިއަރާފައިވާ އެއް ސަރަހައްދުކަން ފާހަގަކޮށްލެވެއެވެ.