ދަނޑުވެރިކަން ކުރަން ބިން ކުއްޔަށް ދޫކުރުމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ހުޅުވާލައިފިއެވެ.
އެޗްޑީސީއިން ބުނީ، އެ ކުންފުނިން ކުރިއަށް ގެންދާ “ރަށްވެހި ދަނޑުވެރިކަން” ނުވަތަ “ކޮމިޔުނިޓީ އާބަން ފާމިން” މަޝްރޫއުގެ ދެވަނަ ފިޔަވަހި ފެއްޓުމަށް ނިންމާފައިވާ ކަމަށާ، އެ މަޝްރޫއުގެ ދަށުން ބިން ކުއްޔަށް ނަގަން ޝައުގުވެރިވާ ފަރާތްތަކަށް އެ ފުރުސަތު ހުޅުވާލެވިފައިވާ ކަމަށެވެ.
އެގޮތުން މިހާރު ބިން ކުއްޔަށް ދޫކުރަން ހުޅުވާލާފައިވަނީ ޒުވާނުން އަދި ހާއްސަ އެހީއަށް ބޭނުންވާ ފަރާތްތަކަށް ހާއްސަ ކުރެވިފައިވާ ބިންތައް އެކަނި ކަމަށާ
ޝަރުތު ހަމަވާ ފަރާތްތަކުން 12 ޖޫންގެ 23:59 ގެ ކުރިން ފޯމު ހުށައަޅަން އެޗްޑީސީން އެދެއެވެ.
އެޗްޑީސީން ހިންގާ ރަށްވެހި ދަނޑުވެރިކަމުގެ މަޝްރޫއަކީ ދަނޑުވެރިކަމަށް އާންމުން ހޭލުންތެރިކަން އިތުރުކޮށް ދަނޑުވެރިކަމުގެ ސިނާއަތަށް މީހުން ޝައުގުވެރި ކުރުމަށް ހިންގާ މަޝްރޫއު އެކެވެ. މި މަޝްރޫއުގެ ފުރަތަމަ ފިޔަވަހީގައި ވަނީ 48 ދަނޑުވެރިންނަށް 16 ބިމެއް ދޫކޮއްފައެވެ.
މި މަޝްރޫއަކީ ރާއްޖެއަށް އާ ކޮންސެޕްޓަކާއި އެކު ފުރަތަމަ ފަހަރަށް ހިންގޭ މަޝްރޫއުއެކެވެ. މި މަޝްރޫއަށް ބިޒްނަސް ސެންޓަރ ކޯޕަރޭޝަން އަދި އެގްރޯނެޓްގެ ފަންނީ އެހީތެރިކަން ލިބެމުން ދެއެވެ.
Advertisement
This content is created and paid for by advertisers and does not involve Voice Journalists
