ދިވެހިރާއްޖެއިން މިއަހަރު ޙައްޖުގެ މަތިވެރި އަޅުކަން އަދާކުރުމަށްދާ މީހުންގެ ފުރަތަމަ ގުރޫޕު މިއަދުގެ ފުރާނެ ކަމަށް ހައްޖު ކޯޕަރޭޝަނުން ބުނެފިއެވެ.

ހައްޖު ކޯޕަރޭޝަނުން ބުނެފައުވާ ގޮތުން، ރާއްޖޭގެ ޙައްޖުވެރީން ސަޢުދީއަށް ފުރާނީ 3 ގުރޫޕަކަށް ބަހާލައިގެންނެވެ.

އެގޮތުން ފުރަތަމަ ގުރޫޕުގައި 272 ޙައްޖުވެރީން ހިމެނޭއިރު އެމީހުންގެ އެހީތެރިންގެ ގޮތުގައި 26 މީހަކު މިއަދު މެންދުރުފަހު 3:25 ގައި ހައްޖަށް ދިޔުމަށް ފުރާނެ އެވެ. 

މިއަދު ފުރާ ގްރޫޕުގެ އެންމެންވެސް މިވަގުތު އެއާޕޯޓްގައި ތިބި އިރު، އެމީހުން ހުކުރު ކޮށްފައިވަނީވެސް އެއާޕޯޓްގައެވެ

ރާއްޖެއިން ޙައްޖާދާ މީހުންގެ ދެވަނަ ގުރޫޕު ފުރަން ހަމަޖެހިފައިވަނީ އަންނަ މަހުގެ 3 ވަނަ ދުވަހުއެވެ. އެ ދުވަހު 330 ޙައްޖާޖީން ފުރާއިރު އެހީތެރިންގެ ގޮތުގައި 23 މީހުން ފުރާނެ ކަމަށް ހައްޖު ކޯޕަރޭޝަނުން ބުނެއެވެ.

އަދި ރާއްޖެއިން ޙައްޖާދާ މީހުންގެ ތިންވަނަ ގުރޫޕު އަންނަ މަހުގެ 7 ވަނަ ދުވަހު ފުރާއިރު، މި ދުވަހު 316 ޙައްޖުވެރީން ފުރާނެ ކަމަށާ މި ގުރޫޕުގެ އެހީތެރިންގެ ގޮތުގައި 23 މީހުން ފުރާނެ ކަމަށް ހައްޖު ކޯޕަރޭޝަނުން މައުލޫމާތު ދެއެވެ.

މި ދެ ގުރޫޕުވެސް ފުރުމަށް ހަމަޖެހިފައިވަނީ އެފުރާ ދުވަހުގެ މެންދުރުފަހު 3:25ގައެވެ. އަދި ހުރިހާ ގުރޫޕެއްވެސް ހައްޖަށް ފުރަން ހަމަޖެހިފައިވަނީ ސަޢުދީއެއަރގައެވެ. މިއަހަރު ރާއްޖެއަށް ލިބިފައިވަނީ 1000 ޙައްޖުވެރީންގެ ކޯޓާއެވެ.

ދިވެހި ޙައްޖުވެރިން ފުރުމަށް އެއަޕޯޓަށް ދިއުމަށް ފަސޭހަ އިންތިޒާމުތަކެއް މި އަހަރުވެސް ވަނީ ސަރުކާރުން ވަނީ ހަމަޖައްސަވާފައެވެ. އެގޮތުން ހައްޖުވެރިން އެއަރޕޯޓަށްދާން ވަކި ޚާއްސަ ބަސްތަކެއް ހަމަޖައްސާފައިވާއިރު ހައްޖުވެރިންގެ އާއިލާތަކުގެ ބޭފުޅުންނަށްވެސް އެއަރޕޯޓަށް ދިޔުމަށްވެސް ބަސްތަކެއްވަނީ ޚާއްސަކޮށްފައެވެ.

އެގޮތުން ޙައްޖުވެރީން ގޮވައިގެން މާލޭގެ 6 ސަރަހައްދަކުން އެއަރޕޯޓަށް ދަތުރުކުރާއިރު، ހުޅުމާލޭގެ ފުރަތަމަ ފިޔަވަހިން 6 ސަރަހައްދެއް އަދި ދެވަނަ ފިޔަވަހީގެ 8 ސަރަހައްދަކަށް ބަސް ހުއްޓާނެއެވެ. އަދި މި ސަރަހައްދުތަކަށް 10:30އިން ފެށިގެން ބަސް ދާން ފަށާނެކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ. އަދި ބަސް އައުމުގެ 15 މިނެޓު ކުރިން އެތަނުގައި ގޮސްހުރުމަށް އެ ވުޒާރާއިން އިލްތިމާސްކުރެއެވެ. އިސްލާމީ ކަންތައްތަކާބެހޭ ވުޒާރާއިން ވިދާޅުވީ އެއަރޕޯޓަށް ދިއުމަށް ޙައްޖުވެރީންނަށާއި ޙައްޖުވެރީންގެ ޢާއިލާތަކަށް އެހީވުމުގެ ގޮތުން ބަސް ހުއްޓާ ތަންތަނުގައި ވުޒާރާގެ މުވައްޒަފުންނާއި ކެޑޭޓުންނާއި ގާލް ގައިޑުން ހަރަކާތްތެރިވަމުންދާނެ ކަމަށެވެ.

މިއަހަރު ރާއްޖޭގެ ހައްޖާޖީންނަށް ހައްޖުގެ އަޅުކަމުގައި އުޅޭއިރުވެސް ގިނަ ފަސޭހަތަކެއް ހައްޖު ކޯޕަރޭޝަނުން ވަނީ ހަމަޖައްސާފައެވެ. އެގޮތުން ހައްޖާޖީން ގެއްލޭ މައްސަލަ ހައްލު ކުރުމަށް ޓެރެކިންގ ޑިވައިސް އެއް ކޮންމެ ހައްޖާޖީއެއްގެ އަތަށް ދޭން ވަނީ ހަމަޖެހިފައެވެ. އަދި މިނާގައި ތުބޭ އިރު ދޭ ކެއުމުގައިވެސް އެހެން އަހަރު ތަކާއި ޚިލާފަށް މިއަހަރު ދިވެހި ރަހަތައް ހިމެނޭނެ ކަމަށް ހައްޖު ކޯޕަރޭޝަނުން ބުނެއެވެ.

ކަލަންޑަރުގައިވާ ގޮތުން މިއަހަރުގެ ޙައްޖު ދުވަސް ދިމާވަނީ ޖޫން މަހުގެ 16 ވާ އާދީއްތަ ދުވަހާއެވެ.