މި މަހު 20 ވަނަ ދުވަހު ބޭއްވުމަށް ހަމަޖެހިފައިވާ، ލޯކަލް ކައުންސިލުތަކުގެ ބައި-އިލެކްޝަންތަކާ ގުޅޭގޮތުން ހުށަހެޅޭ ޝަކުވާއާއި މައްސަލަތައް ބަލައިގަތުމުގެ އިންތިޒާމު އިލެކްޝަންސް ކޮމިޝަން (އީސީ) އިން ހަމަޖައްސައިފިއެވެ.

އީސީއިން ހާމަ ކުރެއްވި ގޮތުގައި ޖުލައި 20 ވަނަ ދުވަހު ބާއްވާ ބައި-އިލެކްޝަންތަކާ ގުޅިގެން، އެއްވެސް ޝަކުވާއެއް ހުށަހަޅާނަމަ، ހުށަހަޅަންވާނީ އެކަމަށް އެ ކޮމިޝަނުން ކަނޑައަޅާފައިވާ  "ޝަކުވާ / މައްސަލަ ހުށަހަޅާ ފޯމު" މެދުވެރިކޮށެވެ. ފޯމު ބަލައިގަތުމަށް ހަމަޖެހިފައިވަނީ އީމެއިލް މެދުވެރިކޮށެވެ.

ޝަކުވާ / މައްސަލަ ހުށަހަޅާ ފޯމު އީމެއިލް ކުރައްވާނީ އެ ކޮމިޝަނުގެ ރަސްމީ އީމެއިލް އެޑްރެސް، [email protected] އަށެވެ. ޝަކުވާ / މައްސަލަ ހުށަހަޅާ ފޯމު އީސީގެ ވެބްސައިޓް www.elections.gov.mv އިން ލިބޭނެއެވެ.

ޝަކުވާ ބަލައިގަތުމަށް ހަމަޖެހިފައިވަނީ، ވޯޓު ލާ ދުވަހު ވޯޓުނަގަން ފެށުނީއްސުރެ، ވޯޓުފޮށިތަކުގެ ވަގުތީ ނަތީޖާ އިއުލާނު ކުރުމާ ހަމައަށެވެ. ވޯޓު ނަގާ ދުވަހު، ވޯޓުލާ މަރުކަޒުތަކުގައި ދިމާވާ މައްސަލަތައް ހައްލުކުރުމަށްޓަކައި ސީދާ ވޯޓު ފޮށީގެ ވެރިޔާއަށް ޝަކުވާ / މައްސަލަ ހުށަހެޅޭނެ ކަމަށްވެސް އީސީއިން ވަނީ ބުނެފައެވެ.

މި ޖުލައި މަހުގެ 20 ވަނަ ދުވަހު ގިނަ ބައި-އިލެކްޝަންތަކެއް ބާއްވަން އީސީއިން ވަނީ ނިންމާފައެވެ. އެގޮތުން ބާއްވަން ހަމަޖެހިފައިވާ ބައި-އިލެކްޝަން ތަކަކީ:

މާލެ ސިޓީ ކައުންސިލުގެ ހުޅުމާލެ ދާއިރާގެ މެންބަރު އިންތިޚާބުކުރުން

މާލެ ސިޓީ ކައުންސިލުގެ މައްޗަންގޮޅި މެދު ދާއިރާގެ މެންބަރު އިންތިޚާބުކުރުން

މާލެ ސިޓީ ކައުންސިލުގެ ހެންވޭރު ހުޅަނގު ދާއިރާގެ މެންބަރު އިންތިޚާބުކުރުން

ރ.ރަސްމާދޫ ކައުންސިލްގެ އަންހެން މެންބަރު އިންތިޚާބު ކުރުން

ޅ.އަތޮޅު ކައުންސިލުގެ ރައީސް އިންތިޚާބު ކުރުން

ފ.ބިލެއްދޫ ކައުންސިލްގެ ރައީސް އިންތިޚާބު ކުރުން

ކުޅުދުއްފުށި ސިޓީ ކައުންސިލްގެ ކުޅުދުއްފުށި އުތުރު ދާއިރާގެ މެންބަރު އިންތިޚާބު ކުރުން

ރ.ހުޅުދުއްފާރު ކައުންސިލުގެ މެންބަރު އިންތިޚާބު ކުރުން

ރ.ރަސްމާދޫ ކައުންސިލުގެ މެންބަރު އިންތިޚާބު ކުރުން

ޅ.ހިންނަވަރު އަދި ފ.ބިލެތްދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރު އިންތިޚާބުކުރުން.