ރައްޔިތުންގެ އިހްސާސްތައް ދަންނަ ކަމަށްބުނެ، ކަނޑާއި ފަޅުން ގޯތި ދީގެން ހިންގާފައިވަނީ ބޮޑު ޖަރީމާއެއް ކަމަށް ނިލަންދޫ ދާއިރާގެ މެންބަރު ފާތިމަތު ސައުދާ ވިދާޅުވެއްޖެއެވެ. 

ސަރުކާރުން ރައްޔިތުންނަށް ދޭންޖެހޭ ގޯތިތައް ވަކި މުއްދަތެއްގެ ތެރޭ އަަވަހަށް ދޫކުރަން ލާޒިމުވާ ގޮތަށް ބިމާބެހޭ ޤާނޫނަށް އެމްޑީޕީން އިސްލާހު ހުށަހެޅި ނިމިދިޔަ 19 ވަނަ ރައްޔިތުންގެ މަޖިލީހުން ފާސްކޮށް ރައީސަށް ފޮނުއްވުމުން ރައީސް ޑރ. މުޙައްމަދު މުއިއްޒު ވަނީ އެ ބިލް ތަސްދީގު ނުކުރައްވައި މިދިޔަ މަހުގެ 16 ވަނަ ދުވަހު އަނބުރާ ފޮނުވާލައިފައިވާއިރު މިއަދު އޮތް ވިހިވަނަ ރައްޔިތުންގެ މަޖިލީހުގެ ތިންވަނަ ޖަލްސާގައި ވަނީ އެ ބިލުގެ ބަހުސް ކުރިއަށް ގެންގޮސްފައެވެ.

އެގޮތުން ބިލަށް ބަހުސްކުރައްވަމުން ސައުދާ ވިދާޅުވީ، ކުރީ ސަރުކާރުން ބޯހިޔާވަހިކަމުގެ މައްސަލަ ހައްލު ކުރުމަށް ކަމަށް ބުނެ ހަގީގަތުގައި ނެތް ބިމަކުން، ކަނޑާއި ފަޅުން ގޯތި ދީގެން ރައްޔިތުންނަށް އޮޅުވާލާފައިވާކަމަށެވެ. 

ސައުދާ ވިދާޅުވީ، ކުރީ ސަރުކާރުން ކަނޑުފަޅުން ގޯތި ދީފައި އޮތުމުން، ރައްޔިތުންނަށް ބޮޑު މާޔޫސްކަމެއް ލިބިފައިވާ ކަމަށެވެ. 

އަދި ބިމާއި ބެހޭ ގާނޫނަށް އިސްލާހު ގެނެސްފައުވާ ގޮތަށް ކޮމިޓީއަށް ފޮނުވައިގެން ކޮމިޓީގެ ވަގުތު ބޭކާރު ކިރެވެން ނެތް ކަމަށާ، އަދުގެ ސަރުކާރުން ބޯހިޔާވަހުކަމުގެ މައްސަލައަށް ދާއިމީ ހައްލެއް ގެނުވަދޭނެ ބިލެއް ފަރުވާލޮށްފައި އޮތް އިރު، 19 ވަނަ މަޖިލީހުން ފާސްކުރި އިސްލާހަށް ފުރުސަތު ދޭން ފެނިވަޑައިނުގަންނަ ކަމަށްވެސް ސައުދާ ވިދާޅުވިއެވެ.