ރާއްޖޭގެ މިނިވަންކަމާއި އިސްތިގުލާލަށް އަސަރު ކުރާގޮތަށް ކުރީގެ ރައީސް އިބްރާހިމް މުޙައްމަދު ޞާލިހުގެ ސަރުކާރުން އިންޑިއާއެކު ސޮއިކުރި އެއްބަސްވުންތަކުގެ މައްސަލަ ބަލަން ރައްޔިތުންގެ މަޖިލީހުގެ 241 ކޮމިޓީން ނިންމައިފިއެވެ.

މަޖިލީހުގެ 241 ކޮމިޓީއަށް މި މައްސަލަ ބަލަން ހުށަހެޅީ ހިތަދޫ މެދު ދާއިރާގެ މެމްބަރު އަހުމަދު އަޒާން އެވެ. އެއާއިއެކު، ކުރީ ސަރުކާރުން އިންޑިއާ އާއިއެކު ހެދި ހަތަރު އެއްބަސްވުމެއްގެ މައްސަލަ ބަލަން މިއަދު އޮތް ކޮމިޓީގެ ބައްދަލުވުމުގައި ވަނީ ފާސްކޮށްފަ އެވެ.

ކޮމިޓީއަށް މިއަދު އަޒާން ހުށަހެޅުއްވީ ދިވެހިރާއްޖޭގެ މިނިވަންކަމާއި އިސްތިގްލާލަށް އުނިކަން އަންނަ ގޮތަށް 2018 ވަނަ އަހަރުން ފެށިގެން 2023 ވަނަ އަހަރާ ދެމެދުގައި ހިނގާފައިވާ ކަންކަން ބެލުމަށް ޕާލިމަންޓަރީ އިންކުއަރީއެއް ހެދުމަށާއި އެ އިންކުއަރީ ކުރިއަށް ދާނެ ގޮތް ރޭވުމަށް ހަތަރު މެންބަރުންގެ ސަބް ކޮމެޓީއެއް ނެގުމަށެވެ.

މި ހުށަހެޅުމާއި ގުޅިގެން އަޒާން ވަނީ ބައެއް ކަންކަން ވެސް ފާހަގަކުރައްވާފައެވެ. އެއީ:

1) ރާއްޖެ އާއި އިންޑިއާއާ ދެމެދު ވެފައި އޮތް ހައިޑްރޯގްރަފީ އެއްބަސްވުމުގައި ސޮއި ނުކުރުމަށް ރައީސް އަބްދުالله ޔާމީންގެ ވެރިކަމުގައި އެމްއެންޑީއެފްއިން އެދުމަށް ފަހު މިދިޔަ ވެރިކަމުގައި އެ އެއްބަސްވުމުގައި ސޮއިކުރިއިރު އެމްއެންޑީއެފްގެ ވިސްނުން ބަދަލުވި ގޮތް ހޯދުމަށް

2) އުތުރު ތިލަފަޅުގައި ބިނާކުރަމުންދާ ސިފައިންގެ އަސްކަރީ ޑޮކްޔާޑާ ގުޅޭ އެއްބަސްވުމުގެ މައްސަލަ ބެލުމަށް

3) ޑޯނިއާ އެއްބަސްވުމަށް ވާސިލުވި ގޮތް ހޯދުމަށް

އަޒާން ވިދާޅުވީ، މި މައްސަލަތައް ބެލުމުގެ ބޭނުމަކީ ކުރިން ތިބި ބައެއްގެ މައްސަލަ ބަލައި އެމީހުން ފަޟީހަތް ކުރަން ނޫންކަމަށާއި، ބޭނުންވަނީ ފަހުން ވެސް މިފަދަ އެއްބަސްވުންތައް ހެދިގެން އަންނައިރު ރާއްޖޭގެ އެންމެ މަތީ މަސްލަހަތު އިސްކޮށް ކުރާ ކަމެއްކަން ކަށަވަރު ކުރަން ކަމަށެވެ.

މިއަދު ގެ 241 ކޮމިޓީގެ ބައްދަލުވުމުގައި އަޒާން އިތުރުން، މާމިގިލި ދާއިރާގެ މެމްބަރު ގާސިމް އިބްރާހިމް ވެސް ވަނީ ދިވެހިރާއްޖެ އާއި މޮރިޝަސްއާ ދެމެދު އިން ކަނޑައެޅުމުގެ މައްސަލާގައި މިދިޔަ ސަރުކާރުން އަމަލުކޮށްފައިވާ ގޮތާ ގުޅޭ މައުލޫމާތު ދިނުމަށް ހުށަހަޅާފައެވެ.

މި މައްސަލަތައް ބަލަން 4 މެމްބަރުން އެކުލެވޭ ކޮމިޓީއެއް އެކުލަވާލިއިރު، އެ ކޮމިޓީގައި ހިމެނޭ މެމްބަރުންނަކީ:

1) ހިތަދޫ މެދު ދާއިރާގެ މެންބަރު އަހްމަދު އަޒާން މަރުޒޫގު

2) ދިއްގަރު ދާއިރާގެ މެންބަރު އަހްމަދު ނާޒިމް

3) ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ

4) ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު

އިންޑިއާ އާއި ރާއްޖެ އާއި ދެމެދު ކުރީ ސަރުކާރުން ވެފައިވާ އެއްބަސްވުމުގެ މައްސަލަ ބަލަން ކޮމިޓީން ނިންމިއިރު، ރައީސް ޑރ.މުޢިއްޒު ވެރިކަމަށް ވަޑައިގެން، ރާއްޖޭގައި ތިބި އިންޑިއާ ސިފައިން ފޮނުވާލާފައިވާކަން ވެސް ފާހަގަކޮށްލަން ޖެހެއެވެ.