ޑިމޮކްރެޓްސް ޑރ.މުޢިއްޒަށް ތާޢީދު ކުރީ މި ދެކޭ ސުލްޙަވެރި އިންޑިއާ ކަނޑުގެ ތަސައްވަރު ފެންނާތީ ކަމަށް ކުރީގެ ރައީސް ނަޝީދު ވިދާޅުވެއްޖެއެވެ. 

މިއަދު، ރައީސް ނަޝީދުގެ ނުރަސްމީ އެކައުންޓް އިން އެކްސްގައި ކުރެއްވި ޕޯސްޓެއްގައި ވިދާޅުވީ، އެމަނިކުފާނު ދެކޭ ގޮތުގައި ޑިމޮކްރެޓްސް ޑރ.މުޢިއްޒަށް ތާޢީދު ކުރީ މިއަދު މި ދެކޭ ސުލްޙަވެރި، ގުޅުން ރަނގަޅު، އިންޑިއާ ކަނޑުގެ ތަސައްވަރު ފެންނަ ކަމުން ކަމަށެވެ.

އަދި ރާއްޖޭގެ ޚާރިޖީ ސިޔާސަތަކީ ކޮންމެ އިންތިޚާބަކަށް ފަހު އަނެއްފުށަށް ޖެހޭ ކަމެއްގެ ގޮތުގައި އޮތުމުން ދިވެހިންނަށް ލިބޭ ގެއްލުން ބޮޑު ކަމަށްވެސް ރައީސް ނަޝީދު، ވިދާޅުވިއެވެ. 

ރައީސް ނަޝީދު، މިއަދު މިހެން ވިދާޅުވެފައިވާއިރު، އިއްޔެ އެމަނިކުފާނުގެ ރަސްމީ އެކަނުންޓް އިން އެކްސްގައި ކުރެއްވި ޕޯސްޓެއްގައި، ދިވެހިރާާއްޖެއާ އިންޑިއާގެ ޚާރިޖީ ގުޅުން، ރަނގަޅު މަގަށް އެޅުވުމަށް ކެތްތެރިކަމާއި، ދުރުވިސްނުމާ އެކު މަސައްކަތްޕުޅު ކުރެއްވިކަމަށްޓަކައި، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށާއި، އިންޑިއާގެ ބޮޑުވަޒީރު ނަރެންދްރަ މޯދީއަށް މަރުޙަބާ ކިޔާކަމަށް ވިދާޅުވެފައިވާކަން ފާހަގަކޮށްލެވެއެވެ.

ރައީސް ނަޝީދު މިފަދައިން ވިދާޅުވެފައިވަނީ 'އިންޑިއާ އައުޓް' ކެމްޕޭނުގެ ސަބަބުން، ރާއްޖެއާ އިންޑިއާގެ ގުޅުމަށް ބުރޫ އަރާފައި އޮތުމަށް ފަހު، އެ ގުޅުން އިޢާދަ ކުރެވެމުންދާ ދަނޑިވަޅެއްގައެވެ. އިންޑިއާ އާއި ރާއްޖޭގެ ގުޅުން، ބަދަހިކޮށް، ރަނގަޅުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ.

އެގޮތުން ރާއްޖޭގެ ޚާރިޖީ ވަޒީރު މޫސާ ޒަމީރު، ދާދި ފަހުން އިންޑިއާއަށް ވަޑައިގެން، އެ ޤައުމުގެ އިސްވެރިންނާ ބައްދަލުކުރައްވާ މަޝްވަރާ ބައްދަލުވުންތައް ބޭއްވި އިރު، އިންޑިއާގެ ބޮޑުވަޒީރު ނަރެންދްރަ މޯދީ، އައު ދަޢުރަކަށް ހޮވިވަޑައިގަތުމުން، އެ މަނިކުފާނު ހުވާ ކުރާ ރަސްމިއްޔާތަށް ވަޑައިގަތުމަށް، މޯދީ ދެއްވި ދަޢުވަތު ޤަބޫލުފުޅުކުރައްވާ، ރައީސް ޑރ. މުޢިއްޒު މި ވަގުތު ހުންނެވީ އިންޑިއާގައި ކަންވެސް ފާހަގަކޮށްލެވެއެވެ. އަދި މި ދަތުރުފުޅުގައި، ރައީސް ޑރ. މުޢިއްޒު ވަނީ، ބޮޑުވަޒީރު މޯދީ ދެއްވި ފަރިއްކޮޅެއްގައި ބައިވެރިވަޑައިގަންނަވާ، އަދި، އިންޑިއާގެ ރައީސާއާވެސް ބައްދަލުކުރައްވާފައެވެ.