ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ގެ އެދި ލެއްވުމުގެ މަތިން، ފަލަސްތީނުގެ ރައްޔިތުންނަށް އެހީވުމަށް ދައުލަތުގެ މީޑިއާ، ޕީއެސްއެމްއިން ކުރިއަށް ގެންދާ "ފަލަސްތީނާއެކު ދިވެހީން" ޓެލެތޯނަށް ސްޓެލްކޯގެ މުވައްޒަފުންގެ ފަރާތުން ބައި މިލިއަން ރުފިޔާ ހަދިޔާކޮށްފިއެވެ.

ސްޓެލްކޯއިން ހަދިޔާކުރި ބައި މިލިއަން ރުފިޔާގެ ޗެކް ވަނީ ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރާއި ހަވާލުކޮށްދެއްވާފައެވެ. 

މިކަމާއި ގުޅިގެން ސްޓެލްކޯއިން އެކްސް ގައި ކުރި ޕޯސްޓެއްގައި ބުނީ، ސްޓެލްކޯގެ ހެޑްއޮފީހުގެ ކުރިމަތީގައި ބަހައްޓާފައިވާ ފަންޑު ފޮއްޓަށް ކުންފުނީގެ އިސްވެރިންނާއި މުވައްޒަފުން އެކި ޢަދަދުތަކުން އެހީތެރިކަން ފޯރުކޮށްދެމުންދާ ކަމަށެވެ.

މިއަދު ހެނދުނު 8 ޖެހިއިރު ފެށި މި ޓެލެތޯން މިރޭ 12 ޖެހުމާއި ހަމައަށް ކުރިއަށް ދިޔުމަށް ހަމަޖެހިފައިވާއިރު، މި ޓެލެތޯނުގައި މާލެ ސިޓީގެ އެކި ސަރަހައްދުގައި 13 ފަންޑު ފޮށި ވަނީ ބަހައްޓާފައެވެ.

ފަނޑު ފޮށިތައް ކައިރިއަށް ނުދެވޭ ފަރާތްތަކަށް ފަސޭހަ ކަމާއި އެކު ފައިސާ ޖަމާކުރެވޭނެ ފަދައިން ދެ އެކައުންޓެއް ވަނީ ހުޅުވާފައެވެ. އެގޮތުން ދިވެހި ފައިސާއިންނަމަ 7730000655865 އަދި ޑޮލަރުން ނަމަ، 7730000655866 އެކައުންޓަށް ފައިސާ ޖަމާ ކުރެވޭނެއެވެ.

ހަމައެއާއިއެކު، 'ފަލަސްޠީނާއެކު ދިވެހީން' ޚާއްޞަ ޓެލެތޯނުގެ ކަންކަން ދެފުށް ފެންނަ ގޮތަށް ކުރިއަށް ގެންދިޔުމަށާއި ހަރަކާތުން ލިބޭ ފައިސާ އޭގެ ހައްގުވެރިންނާ ހަމައަށް ފޯރާކަން ޔަޤީންކުރުމަށް މިނިވަން އޮޑިޓަރެއް ހަމަޖައްސާފައިވާކަން ވެސް ފާހަގަކޮށްލަން ޖެހެއެވެ.