އަންހެނުންތަކެއް, ފިިރިހެނުން ހައްލައިގެން ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓަކަށް ވައްދައިގެން ފޭރޭ މައްސަލައިގައި ހައްޔަރު ކުރި 7 މީހުންގެ ތެރެއިން 2 މީހަކު ފުލުހުން ދޫކޮށްލައިފިއެވެ.

ފުލުހުންގެ ހިދުމަތުން މިއަދު ބޭއްވި ނޫސްވެރިންގެ ބައްދަލުވުމެއްގައި ހުޅުމާލެ ދެވަނަ ފިޔަވަހީގެ ޕޮލިސް ސްޓޭޝަން ގެ އިންޗާޖް ރަޖިނީ ސުވައިދު ވިދާޅުވީ، ހިޔާ ފްލެޓްގެ H5-3-18 ނަންބަރު ފްލެޓަށް އޮޅުވާލައިގެން މީހުން ގެންގޮސް ބަރަހާނަކޮށް ބްލެކްމެއިލް ކޮށްގެން ފައިސާއާއި މޯބައިލް ފޯނު ފަދަ ތަކެތި ފޭރޭ މައްސަލަ އެއް ބަލަމުން އަންނަ ކަމަށެވެ.

ރަޖުނީ ވިދާޅުވީ، މިހާތަނަށް އެކަމާއި ގުޅޭ 5 މައްސަލަ އެއް ހުށަހަޅާފައިވާ ކަމަށާއި، މި މީހުން މިކަން ކުރަނީ އެ އެޕާޓްމެންޓުގައި ދިރިއުޅޭ ބަޔަކާއި އެޕާޓްމެންޓަށް ވަދެ ނިކުމެ އުޅޭ ބަޔަކާއި ގުޅިގެން ކަމަށެވެ.

މި ބައްދަލުވުމުގައި ފުލުހުން ވަނީ އެ މައްސަލައިގައި ޝާމިލުވާ ފަރާތަކުގެ ވަނަވަރު ހާމަކޮށްފައެވެ. އެ މީހުންނަކީ:

1) އައިމިނަތު ހުމައިނާ ޒަކަރިއްޔާ (24އ)- މ. ގޮއިބިލިގަސްދޮށުގެ

2) އާޔަތު އައްބަސް (30އ)- ދަފްތަރު ނަންބަރު ދރ 1835

3) މުހައްމަދު އާދަމް (43އ)- ޕެލަސް ހައުސް، ގއ. ދާންދޫ

4) ސަމާހު އަލީ (31އ)- ގ. ކަނދުމާގެއާގެ

5) މުހައްމަދު މުނީރު (35އ)- ސަންފްލާވާ، ދ.ކުޑަހުވަދޫ

6) އަހުމަދު މާޖިދު (33އ)- ކިފާޒް/ނ. ވެލިދޫ

7) އަހުމަދު މަދީހު (34އ)- މ. ސީނަރީވިއު

މިކަމާއި ގުޅިގެން މިހާތަނަށް ހުށަހެޅިފައިވާ ފަސް މައްސަލައިގައި ވެސް މި މީހުންގެ ތެރެއިން އިސްކޮށް ހަރަކާތްތެރިވެފައިވަނީ އައިމިނަތު ހުމައިނާ ޒަކަރިއްޔާއާއި އާޔަތު އައްބާސް ކަމަށް ރަޖުނީ ވިދާޅުވިއެވެ.

އެހެންނަމަވެސް ހުމައިނާ އަކީ  މާބަނޑު އަންހެނަކަށްވާތީ އޭނާގެ ސިއްހީ ހާލަތަށް ރިއާޔަތްކޮށް ކޯޓަށް ނުގެންގޮސް ދޫކޮށްލާފައިވާ ކަމަށާއި، އޭނާ ގެ އިތުރުން މި މައްސަލައިގައި ހިމެނޭ މަދީހު 15 ދުވަހަށް ބަންދުކުރުމަށް ފަހު ފުލުހުން ވަނީ ދޫކޮށްލާފައިއެވެ.