ރަނގަޅު ކާނާ ނުލިބުމުގެ ސަބަބުން ޣައްޒާގެ 50 ހާސް ކުޑަކުދިންނަށް އަވަސް ސިއްހީ ފަރުވާ ބޭނުންވާކަމަށް ފަލަސްތީނުގެ ރެފިއުޖީންނާ ބެހޭ އދގެ ޖަމްއިއްޔާއިން ބުނެފިއެވެ.

ހޮނިހިރު ދުވަހު ޔޫއެން ރިލީފް އެންޑް ވަރކްސް އެޖެންސީއިން ނެރުނު ބަޔާނެއްގައި ބުނީ އިންސާނީ އެހީ ޣައްޒާއަށް ފޯރުކޮށްދިނުމަށް އިސްރާއީލުން ހުރަސްއެޅުމުގެ ސަބަބުން ޣައްޒާގައި ތިބި ފަލަސްތީނުގެ ރައްޔިތުން ތިބީ ބަނޑުހައިހޫނުކަމުގައި ކަމަށާއި، އެހީ ފޯރުކޮށްނުދެވިއްޖެނަމަ އެކަމުގެ ނަތީޖާ ވަރަށް ގޯސްވާނެކަމަށެވެ.

އދގެ ކުޑަކުދިންގެ ޖަމްއިއްޔާ ޔުނިސެފްގެ ތަރުޖަމާނު ޖޭމްސް އެލްޑަރ ވިދާޅުވީ ޣައްޒާއަށް އެހީ އެތެރެކުރުމަކީވެސް އެހާ އުނދަގޫކަމެއްކަމަށާއި، އެތެރެކުރެވޭ އެހީ، އެ އެހީ ބޭނުންވާ ފަރާތްތަކަށް ބެހުމަކީވެސް އެހާ އުނދަގޫކަމެއް ކަމަށެވެ. އދ އުފެދުނުފަހުން އެޖަމްއިއްޔާގެ އެހީތެރިންގެ އެންމެ ގިނަ ބަޔަކު މަރުވެފައިވަނީވެސް އިސްރާއީލުން ޣައްޒާގައި މިހާރު ހިންގަމުންދާ ޢުދުވާނުގައެވެ.

އިސްރާއީލުގެ އިންސާނިއްޔަތާއި ޚިލާފު ޢަމަލުތަކުގެ ތެރޭގައި، ޣައްޒާއަށް އެހީ ހިފައިގެންދާ ގާފިލާތަކަށް ޖެއްސުންކޮށް ދުއްތުރާކުރުން ހިމެނެއެވެ. ޔުނިސެފުން ބުނީ އިސްރާއީލުގެ ކަމާބެހޭ ފަރާތްތަކުން ކުރިއާލައި ހުއްދަ ހޯދައިގެން ފަލަސްތީނުގެ 10 ހާސް ކުޑަކުދިންނަށް ބޭނުންވާ ބޭސް ހިފައިގެން ދިޔަ އުޅަނދަކަށްވެސް އިސްރާއީލުން ޖެއްސުންކުރިކަމަށެވެ. އެގޮތުން ދާއިރުއްބާލާ އިން ދަތުރުފަށައިގެން ޣައްޒާ ސިޓީއަށް ކުރި 40 ކިލޯމީޓަރުގެ ދަތުރަށް 13 ގަޑިއިރުވިކަމަށާއި، އޭގެތެރެއިން 8 ގަޑިއިރު ހޭދަވީ ޗެކްޕޮއިންޓްތަކުގައި އިސްރާއީލުގެ އޮފިޝަލުންނާ ޒުވާބުކުރުމުގައިކަމަށްވެއެވެ. އިސްރާއީލުގެ އޮފިޝަލުން އެ އުޅަނދަނީ ވޭނެއްތޯ ނުވަތަ ޓްރަކެއްތޯ ކަނޑައެޅުމަށް އެ ވެހިކަލް ބެލުމަށް އެތައް ގަޑިއިރެއްވެސް ވިއެވެ.

"ކަމުގެ ހަގީގަތަކީ އިސްރާއީލުން އެހީ ހިފައިގެން ދިޔަ މި ވެހިކަލަށް ހުރަސް އެޅީ. އެ އެހީ ފަލަސްތީނުގެ ކުޑަކުދިންނަށް ނުލިބުނީ. ފަލަސްތީނުގެ ބިންތަކަށް ވެރިވެފައިވާ އިސްތިއުމާރީ ބާރުގެ ހައިސިއްޔަތުން، އެ އެއީ އެކުދިންނަށް ލިބިދޭކަން ކަށަވަރުކުރުމަކީ އިސްރާއީލުގެ މައްޗަށް ބައިނަލްއަގްވާމީ ގާނޫނުން ލާޒިމްކުރާކަމެއް"، ޔުނިސެފްގެ ތަރުޖަމާނު ވިދާޅުވިއެވެ.

އިސްރާއީލުގެ އަސްކަރިއްޔާގެ އިތުރުން ހައްދުފަހަނައެޅި ޔަހޫދީ އާއްމުންވެސް ގެންދަނީ އެހީ ހިފައިގެންދާ ގާފިލާތަކަށް މަގުމަތިން ހުރަސްއަޅަމުންނެވެ.