އައްޑޫ ސިޓީގައި ހުންނަ މިފްކޯގެ ފިޝަރީޒް ކޮމްޕްލެކްސް (އޭއެފްސީ) އަށް ފުލުހުންގެ އެހީތެރިކަމާއި އެކު ކަރަންޓު ދީ، އޮޕަރޭޝަނަށް ގެނައުމުގެ މަސައްކަތް ފަށާފައިވާ ކަމަށް މިފްކޯއިން ބުނެފިއެވެ.
މިފްކޯއިން ބުނީ، އޭއެފްސީ ގެ އޮޕަރޭޝަން ފެށުމަށް ސައިޓަށް ކަރަންޓު ދިނުމުގައި ފުލުހުންގެ އެހީތެރިކަން ބޭނުންވާތީ އެބޭފުޅުންނާއި އެކު މަޝްވަރާގެ ބައްދަލުވުމެއް ބާއްވާފައިވާ ކަމަށެވެ.
އެގޮތުން މިއަދު މެންދުރު ފަހު ސައިޓް އަށް ކަރަންޓު ދިނުމަށް މަސައްކަތް ކުރަމުންދާ ކަމަށް މިފްކޯއިން ބުނެއެވެ.
މަސްވެރިންނަށް ދޭންޖެހޭ ލާރި ދިނުން ލަސްވާތީ، އޭއެފްސީގައި މަސްވެރިން ކުރަމުންދާ މުޒާހަރާގެ ތެރެއިން، މަސްފެކްޓްރީގެ ކަރަންޓް ކަނޑާލި އިރު މުވައްޒަފުންނަށް ދަތި ކުރުމުގެ ފިޔަވަޅުތަކެއް މުޒާހަރާގެ ބައިވެރިން ވަނީ އަޅާފައެވެ.
މިގޮތުން އޭއެފްސީއަށް ފަހަތުން ވަދެވޭ ގޮތަށް ހުރި ދޮރު މަސްވެރިން ބަންދުކޮށްފައިވާއިރު، މަސްވެރިންގެ ޓީމަކުން ވަނީ ސައިޓް ގައި ހުރި މިފްކޯގެ ދިދަ ވެސް ނަގާފައެވެ.
މިކަންކަމާއި ގުޅިގެން އިއްޔެ މިފްކޯއިން ނެރުނު ނޫސްބަޔާނެއްގައި ބުނީ، އައްޑޫ ސިޓީގައި ހުންނަ މިފްކޯގެ ފިޝަރީޒް ކޮމްޕްލެކްސް އޮޕަރޭޝަނަށް ގެންނައުމަށް އެކުންފުނިން މަސައްކަތް ކުރަމުންދާއިރު، އެ މަސައްކަތަށާއި ފުލުހުންގެ ޒިންމާތަކަށް ހުރަސް އަޅާނަމަ ފިޔަވަޅު އަޅަން ނިންމާފައިވާ ކަމަށެވެ.
މިގޮތުން، ތަން އޮޕަރޭޝަނަށް ގެނައުމަށް ކަމާބެހޭ ފަރާތްތަކާއި ގުޅިގެން މިފްކޯއިން މަސައްކަތް ކުރަމުންދާ ކަމަށާއި، އެ މަސައްކަތަށާއި، ފުލުހުންގެ ޒިންމާތަކަށް ހުރަސް އަޅާ ދޯނިފަހަރުން މިފްކޯއަށް މަސްގަތުން 3 މަސް ދުވަހަށް ސަސްޕެންޑު ކުރުމަށް ނިންމާފައިވާ ކަމަށް މިފްކޯއިން ބުނެއެވެ.
Advertisement
This content is created and paid for by advertisers and does not involve Voice Journalists
