ރާއްޖެއަށް މިހާރު ކުރިމަތިވެފައިވާ އިގްތިސާދީ އުދަނގޫ ހާލަތާ ކުރިމަތިލާން ޖެހުނީ މިދިޔަ 10 އަހަރު ތެރޭގައި ސަރުކާރުތަކުން ގެންގުޅުނު ސިޔާސަތުތަކުގެ ސަބަބުން ވޯލްޑް ބޭންކުން ރާއްޖެއަށް ކަނޑައަޅާފައި ހުންނަވާ ކަންޓްރީ އިކޮނޮމިސްޓް އަދި ރެޒިޑެންޓް ކޯޑިނޭޓަރު އެރްދެމް އަތާސް ވިދާޅުވެއްޖެ އެވެ.

އެރްދެމް މިހެން ވިދާޅުވެފައިވަނީ ފިޗް ރޭޓިންގްސް އިން ރާއްޖެއަށް ދީފައިވާ "ބީ މައިނަސް"ގެ ރޭޓިން "ސީސީސީ ޕްލަސް"އަށް ދަށްކޮށްފައި ވުމާއި ގުޅިގެން އެކސްގައި ކުރެއްވި ޕޯސްޓެއްގައެވެ.

އެގޮތުން، އެރްދެމް އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެއަށް މިހާރު ކުރިމަތިވެފައިވާ އިގްތިސާދީ ނާޒުކު ހާލަތަކީ މިދިޔަ 10 އަހަރު ތެރޭގައި ބޮޑެތި އަދަދުތަކުން ދަރަނި އުފެއްދުމުގެ އިތުރުން އެ 10 އަހަރު ތެރޭގައި މެދުނުކެނޑި ފިސްކަލް އަދި ކަރަންޓް އެކައުންޓް ޑެފިސިޓް ބޮޑުވާން ދޫކޮށްލުމުން ދިމާވި ހާލަތެއް ކަމަށެވެ. 

އަދި އިގްތިސާދީ ކުރިއެރުމާއި އިތުރު މާލީ އެހީތަކެއް ރާއްޖެއަށް ދިން ނަމަވެސް މިހާރު ކުރިމަތިވެފައިވާ މައްސަލަތަކަށް ހައްލެއް ނުލިބޭނެ ކަމަށް އޭނާ ވިދާޅުވިއެވެ.

“އިގްތިސާދީ ދަތިތަކުން އަރައިގަނެ، ފިސްކަލް އަދި ކަރަންޓް އެކައުންޓް ޑެފިސިޓް ކުޑަކުރުމަށް އެންމެ މުހިއްމީ ހަރަދު ކުޑަކުރުން. އެކަން ކޮށްފިނަމަ، އެމްއެމްއޭގެ ރިޒާވަށް އެކަމުން އެހީތެރިކަމެއް ވެދެވޭނެ. އަދި މެދު ރާސްތާއެއްގައި ދަރަނީގެ ހާލަތު ރަނގަޅު ކުރުމަށްވެސް އެހީތެރިވެދޭނެ،"

މިއާއެކު އެރްދެމް ވަނީ ރާއްޖޭގެ އިގްތިސާދީ ހާލަތު ރަނގަޅު ކުރުމަށް ގެންނަން ޖެހޭ އިސްލާހީ ބަދަލުތައް ގެނައުމަށް ސަރުކާރުން ކުރަމުންދާ މަސައްކަތްތައް ބަލައިގަންނަ ކަމަށް ވިދާޅުވެފައެވެ.

އެރްދެމް މިހެން ވިދާޅުވެފައިވާއިރު، ފިނޭންސް މިނިސްޓްރީން މިހާރު ވަނީ 2028 ވަނަ އަހަރާ ހަމައަށް އާމްދަނީ އިތުރު ކުރުމަށް އަޅާނެ ފިޔަވަޅުތަކުގެ ސްޓްރެޓެޖީއެއްއާންމުކޮށްފައެވެ. އޭގެ ތެރޭގައި ޖީއެސްޓީ ނެގުން ފުޅާކޮށް، އިމްޕޯޓް ޑިއުޓީ އާއި ޓެލެކޮމް ރޭޓަށް ބަދަލުތައް ގެނައުން ހިމަނައިފައިވެއެވެ.