އިގްތިޞާދީ ގޮތުން ރާއްޖެ މިހާ ދަށް ހާލަތަށް ވެއްޓުނީ ކުރީގެ ރައީސް އިބްރާހިމް މުޙައްމަދު ޞާލިހުގެ ސަރުކާރުން ނެގި ލޯނުތަކާއި ދަރަނި ތަކުގެ ސަބަބުން ކަމަށް މާމިގިލި ދާއިރާގެ މެމްބަރު އަދި މާލިއްޔަތު ކޮމިޓީގެ މުޤައްރިރު ޤާސިމް އިބްރާހީމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީން މާލީ ވަޒީރު ވަޒީރު ޑރ.މުޙައްމަދު ޝަފީޤް ހާޒިރުކުރައްވައި ކުރިއަށް ގެންދިޔަ ބައްދަލުވުމުގައި ވާހަކަފުޅު ދައްކަވަމުން ޤާސިމް ވިދާޅުވީ، ވަޒީރާއި، ކޮމިޓީގެ މެންބަރުންގެ ވާހަކަފުޅުތަކުން، ކުރީ ސަރުކާރުން އެކި ނެގި ލޯނުތަކާއި ދަރަނީގެ ސަބަބުން، ރާއްޖޭގެ އިޤްތިޞާދަށް ބުރަ ބޮޑުވެފައިވާ ހާމަވެގެން ދިޔަ ކަމަށެވެ.

ޤާސިމް ވަނީ ރާއްޖޭގެ އިގްތިޞާދު ބޮޑު އަނދަވަޅަކަށް ވެއްޓުނީ ކުރީ ސަރުކާރުން އެއްވެސް ރޭވުންތެރިކަމެއް ނެތި ހިންގާފައިވާ ދަރަނިތައް ފޫބެއްދުމަށް އެކަށީގެންވާ ހައްލެއް ހޯދާފައިނުވާތީ ކަމަށް ވެސް ވިދާޅުވެފައެވެ.

Advertisement

ޤާސިމް ވިދާޅުވީ، ސުކޫކާއި ބޮންޑާއި ލޯނުގެ ގޮތުގައި ނަގާފައި ހުރި ފައިސާ ދައްކާއިރު، 2025 އާއި 2026 ވަނަ އަހަރު ދަރަނީގެ ގޮތުގައި ދައްކަން ޖެހޭ ފައިސާ 1 ބިލިއަން ޑޮލަރަށް ވުރެ މައްޗަށް އަރާކަމަށެވެ. 2025 ވަނަ އަހަރު އެކަނިވެސް 500 މިލިއަން ޑޮލަރު ދައްކަން ޖެހޭ ކަމަށާއި، މިއަހަރު ވެސް ދަރަނީގެ ގޮތުގައި ފައިސާ ދައްކަން ޖެހޭކަމަށާއި، މިއީ މި ސަރުކާރުން ނެގި ދަރަނިތަކެއް ނޫންކަން ޤާސިމް ފާހަގަކުރެއްވިއެވެ.

މީގެ އިތުރުންވެސް ޤާސިމް ވިދާޅުވީ،ވޯލްޑް ބޭންކާއި ޔޫއެސް ޓްރެޜަރީ ޑިޕަރޓްމަންޓްގެ ބޭފުޅުން ސަރުކާރާއި ބައްދަލުކޮށް، އާސަންދަ ނުދެވި، މަސްވެރިންނަށް ލާރި ދިނުމަށް ދަތިވަނީވެސް މި ދަރަނި ތަކުގެ ސަބަބުން ކަމަށެވެ. އަދި މި ދަރަނި ނެގީ މި ސަރުކާރުން ނޫން ކަމަށާއި، މިއީ ނިމިދިޔަ އެމްޑީޕީ ސަރުކާރުން ނެގި ދަރަނިތަކެއްކަމަށް ޤާސިމް ވިދާޅުވިއެވެ. 

ކޮމިޓީގެ ބައްދަލުވުމުގައި ވާހަކަފުޅު ދައްކަވަމުން ޤާސިމް ވަނީ ރާއްޖޭގެ އިގްތިޞާދު ހަމަމަގަށް އަޅުވަން ރައީސް ޑރ.މުޙައްމަދު މުޢިއްޒުގެ ސަރުކާރުން ކުރައްވަމުން ގެންދަވާ ބުރަ މަސައްކަތް ފާހަގަކުރައްވާ، ސަރުކާރަށް މަރުޙަބާ ވިދާޅުވެފައެވެ.