ދިވެހިބަހުގެ އެކެޑެމީގެ ކުރީގެ ރައީސް އަޝްރަފް އަލީ ލިޔުއްވާފައިވާ "ދިވެހިބަސް - ދިވެހީންގެ ޝަރަފު" ފޮތް ރޭ ނެރެފިއެވެ.
ރޭ ގައުމީ ދާރުލްއާސާރުގައި ބޭއްވި ޚާއްސަ ހަފްލާއެއްގައި މި ފޮތް ނެރެދެއްވާފައިވަނީ، ހަފްލާގެ ޝަރަފްވެރި މެހެމާން، ގައުމީ ޔުނިވަސިޓީގެ ޗާންސެލާ ޑރ. މަހުމޫދު ޝައުގީއެވެ.
މިއީ އަޝްރަފް ލިޔުއްވި އެންމެ ފުރަތަމަ ފޮތް ކަމަށްވާއިރު، މި ފޮތަކީ ދިވެހި ބަހާ ބެހޭ ގިނަ މައުލޫމާތު ތަކާއި، އިލްމީ މަޒުމޫނުތަކާއި ދިވެހި ބަހަށް މިހާރު ވަމުންދާ ގޮތާ ގުޅޭގޮތުން އަޝްރަފްގެ ރައުޔު ހިމެނައިގެން އެކުލަވާލެވިފައިވާ ފޮތެވެ.
މި ފޮތުގައި ދިވެހިބަހުގެ ހަރުދަނާ، ސިޔާސަތުތައް ހިމަނާފައިވާއިރު، މިއީ މަތީ ތައުލީމު ހާސިލުކުރާ ދަރިވަރުންނަށް އެސެސްމެންޓު ހެދުމުގައި ބޭނުންވާ ވަރަށް ގިނަ މައުލޫމާތު ހިމެނިފައިވާ ފޮތެއްކަން ފާހަގަކޮށްލަންޖެހެއެވެ.
"ދިވެހިބަސް - ދިވެހީންގެ ޝަރަފު" ފޮތް ނެރުމަށް ބޭއްވި ހަފްލާގައި އަޝްރަފް ވާހަކަ ދައްކަވަނީ: ފޮޓޯ/ ވޮއިސް
ފޮތް ނެރުމަށް ބޭއްވި ހަފްލާގައި ވާހަކަދައްކަވަމުން އަޝްރަފް ވިދާޅުވީ، ފޮތުގެ މައި މޫތައް ގުޅިފައިވަނީ މަތީ ތައުލީމާ ކަމަށެވެ. އަދި، އޭނާގެ ތަޖުރިބާއާއި، ބަހާއި މެދު ހިތުގައި އުފެދިފައިވާ އެކިއެކި ޝުޢޫރުރުތައް ފޮތުގައި ހިމެނިފައިވާނެ ކަމަށް އަޝްރަފް ވިދާޅުވިއެވެ.
މި ފޮތުން ތިޔަބޭފުޅުންނަށް ފެނިވަޑައިގަންނަވާނީ އަޅުގަނޑު. ހަގީގަތުގައި ވެސް އެކި ދުވަސްތައް މަތިން އަޅުގަނޑުގެ ހިތުގައި ދިވެހިބަހަށް އުފެދިފައި ހުރި ޝުއޫރުތަކާއި ވަރަށް ގިނަ ކަންކަމުގެ އަލީގައި އަޅުގަނޑުގެ ހިތަށް އެރި އެއްޗެހި މި ފޮތުގައި ހުންނާނެ
އަޝްރަފް ޢަލީ
އަޝްރަފްގެ "ދިވެހިބަސް، ދިވެހީންގެ ޝަރަފު" މި ފޮތް ވިއްކަނީ 200 ރުފިޔާއަށެވެ.
Advertisement
This content is created and paid for by advertisers and does not involve Voice Journalists
