މާފުށީ ޖަލުގައި ޝަރީޢަތް ނިމެންދެން ބަންދުކޮށްފައި ހުއްޓާ ނިޔާވި މުޙައްމަދު ޖަމީލް ގެ ހަށިގަނޑުގެ ޕޯސްޓްމޯޓަމް ހެދުމުގެ ހުއްދައަށް އެދި ޖަމީލްގެ އާއިލާއަށް އާދޭސް ދެންނެވިކަމަށާއި، އޮޓޮޕްސީ ނުހަދާ ޖަމީލުގެ ހަށިގަނޑު ވަޅުލީ އާއިލާއިން އެކަމަށް ހުއްދަ ނެދެއްވުމުން ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.

ޖަމީލުގެ މަރާ ގުޅޭގޮތުން ނޫސްވެރިންނަށް މައުލޫމާތު ދެއްވުމަށް މިއަދު ބޭއްވި ޕްރެސްގައި ވާހަކަފުޅު ދައްކަވަމުން ވަޒީރު އިޙްސާން ވިދާޅުވީ އޮޓޮޕްސީ ހެދުމަށް ޖަމީލުގެ އާއިލާއަށް އާދޭސް ދެންނެވުމުންވެސް، އާއިލާއިން ބުނެފައިވަނީ ޖަމީލު މަރުވީ ގަސްތުގައި ބަޔަކު ގެއްލުންދީގެން ކަމަށް ގަބޫލުނުކުރާ ކަމަށެވެ. މީގެ އިތުރުން، ޕޯސްޓްމޯޓަމް ހަދައިގެން ޖަމީލުގެ ހަށިގަނޑަށް އިތުރަށް ގެއްލުންދޭން ބޭނުން ނުވާ ކަމަށްވެސް އާއިލާއިން ބުނެފައިވާ ކަމަށް ވަޒީރު އިހުސާން ފާހަގަކުރެއްވިއެވެ. ޖަމީލުގެ މަރާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، ޖަމީލްގެ އަނގައާއި ނޭފަތުން ފޮނު ޒާތުގެ ތަކެތި އައިކަން ފާހަގަކުރެވިފައިވާ ކަމަށާއި، އަދި އޭގެ އިތުރުން ގޮޅިންނާއި ހަށިގަނޑުން ވެސް އޭނާ އަށް ކުޑަކަމުދެވިފައި ހުރި ކަން ފާހަގަކުރެވިފައިވާ ކަމަށެވެ.

އޮޓްޕްސީ ހަދަން ނިންމި ސަބަބާބެހޭ ގޮތުން ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން ވިދާޅުވީ، އޮޓޮޕްސީ ހަދަން ނިންމީ، ނިޔާވެފައި އޮންނަ މީހެއްގެ ހަށިގަނޑު އޮންނަ އޮތުމުން ހަށިގަނޑުގެ ކުލައަށާއި އައިސްފައި ހުންނަ ބަދަލުތައް އެއީ ބަޔަކު އަނިޔާކޮށްގެން ދީފައިވާ ގެއްލުންތަކެއްކަން ދޭހަވާ ގޮތަށް ވާހަކަތައް ދެކެވެން ފެށި ހިސާބުން ކަމަށެވެ.

ޖަމީލްގެ ހަށިގަނޑު ވަޅުލައިފައިވަނީ ރޭ ފަތިސް ނަމާދަށް ފަހު ގަލޮޅު ސަހަރާގައެވެ.