ކޮންމެ މަހަކު ޤުރުއާނުން ތިން ފޮތަށްވުރެ ގިނައިން ދަސްކުރާ ކުދިންނަށް ޚާއްސަ ޕޮކެޓް މަނީއެއް އަންނަ އަހަރުން ފެށިގެން ފޯރުކޮށްދޭނެ ކަމަށާ، ޤުރުއާން ހިތުދަސްކުރާ ދަރިވަރުން އުމްރާއަށް ފޮނުވުމުގެ މަޝްރޫޢުއެއް ފެށުމަށް ހަމަޖެހުފައިވާ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ގުރުއާން ކިޔެވުމުގެ 36ވަނަ ގައުމީ މުބާރާތް ފެށުމަށް ރޭ ބޭއްވި ރަސްމިއްޔާތުގައި ވަޒީރު ވިދާޅުވީ ކީރިތި ޤުރްއާނަށާއި، އިސްލާމްދީނަށް ސަރުކާރުން ބޮޑު އަހައްމިއްޔަތުކަމެއް ދެއްވާ ކަމަށާ، ރައީސުލްޖުމުޙޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯ ތަންފީޒު ކުރުމަށް ކީރިތި ޤުރްއާނާއި ބެހޭ މަރުކަޒަށް އިސްލާމީ ކަންތައްތަކާބެހޭ ވުޒާރާގެ ފަރާތުން ފުރިހަމަ އެއްބާރުލުން ލިބިގެންދާނެ ކަމަށެވެ.

މިއާއެކު ޝަހީމް ވަނީ ރާއްޖޭގައި ގުރުއާނުގެ އިލްމު ފުޅާކޮށް، ގުރުއާން ހިތުދަސްކުރުމަށް ބާރު އެޅުމަށް ކުރަމުންދާ މަސައްކަތުގެ ތެރެއިން އަންނަ އަހަރުން ފެށިގެން މަހަކު ތިން ފޮތަށްވުރެ ގިނައިން ދަސްކުރާ ކުދިންނަށް ޕޮކެޓްމަނީ ދޭން ނިންމާފައިވާކަން އިއުލާން ކުރައްވާފައެވެ. 

ވަޒީރު، ޑރ. ޝަހީމް އިތުރަށް ވިދާޅުވީ ޤުރުއާން ހިތުދަސްކުރާ ކުދިންނަށް ޕޮކެޓް މަނީއެއް ދިނުމުގެ އިތުރުން އުމްރާގެ އަޅުކަމަށް ފޮނުވުމުގެ މަޝްރޫއެއް ކުރިއަށް އޮތް ދެ މަސްދުވަހުގެ ތެރޭގައި ފައްޓަވާނެކަން އިއުލާން ކުރައްވާފައެވެ. އަދި ވިދާޅުވީ، އެ މަޝްރޫގެ ދަށުން ފުރަތަމަ އުމްރާއަށް ފޮނުވާނީ ފުވައްމުލަކު ސިޓީން ގުރުއާން ހިތުދަސްކުރި ހަތް ދަރިވަރުން ކަމަށެވެ.

ޑރ. ޝަހީމް ވިދާޅުވީ، ޤުރުއާނުގެ އިލްމް މުޅިރާއްޖެއަށް ފެތުރުމަށް، ޤުރުއާނާ ބެހޭ މަރުކަޒު ހިންގަން ޚާއްޞަ ބިނާއެއް ޤާއިމް ކުރައްވަން މަސައްކަތް ކުރައްވާނެ ކަމަށާއި އަދި އްޑޫއާއި ފުވައްމުލަކުގެ އިތުރުން ހައްދުން މައްޗާއި އެހެނިހެން ބައެއް ސަރަހައްދުތަކުގައި ވެސް ޤުރުއާނާ ބެހޭ މަރުކަޒެއް ގާއިމް ކުރަން މަސައްކަތް ކުރައްވާނެ ކަމަށެވެ.

މީގެ 36 އަހަރު ކުރިން ފެށި ކީރިތި ޤުރުއާން ކިޔެވުމުގެ ޤައުމީ މުބާރާތަކީ ވަރަށް ވަރުގަދަ މަދަރުސާއެއްކަމަށާ އެ މަދަރުސާއިން ތަމްރީންވެފައިވާ އެތައް ދަރިވަރުންތަކެއް މިއަދު ދުނިޔޭގެ އެކި ކަންކޮޅުތަކުގައި ކުރިއަށްދާ ތަފާތު އެކި ޤުރުއާން މުބާރާތްތަކުގައި ރާއްޖެ ތަމްސީލުކުރަމުންދާ ކަންވެސް ވަޒީރު ފާހަގަކުރެއްވިއެވެ.

ގުރުއާން ކިޔެވުމުގެ 36 ވަނަ ޤައުމީ މުބާރާތުގައި 119 މުއައްސަސާއަކުން 1029 ބައިވެރިން ވާދަކުރެއެވެ. މިއަހަރުގެ މުބާރާތް ހުޅުވާލާފައިވަނީ އަތޮޅު ކައުންސިލްތަކަށާއި، ސިޓީ ކައުންސިލްތަކަށާއި ޤުރްއާން ކުލާސްތަކުގެ އިތުރުން ހާފިޒުންނަށް ބައިވެރިވެވޭ ގޮތަށެވެ. މިފަހަރުގެ ބައިވެރިންގެ ތެރޭގައި 52 ސްކޫލުން 365 ދަރިވަރުންނާއި، ކައުންސިލްތަކުގެ ފަރާތުން ވާދަކުރާ 357 ބައިވެރިންގެ އިތުރުން އެހެނިހެން މުއައްސަސާތަކުގެ 292 ބައިވެރިނ ހިމެނެއެވެ. އަދި ހާފިޒުންގެ ބައިން 15 ބައިވެރިން މި އަހަރު ވާދަކުރެއެވެ.