ރައީސުލްޖުމްހޫިރިއްޔާ ޑރ.މުޙައްމަދު މުޢިއްޒުގެ ދެކަނބަލުންނަށް ސިހުރު ހެދި ކަމުގެ ތުހުމަތުގައި ހައްޔަރު ކުރެވުނު އެންވަޔަރަމަންޓުގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމްގެ ބަންދަށް ކްރިމިނަލް ކޯޓުން އިތުރު 7 ދުވަސް ޖަހައިފިއެވެ.

ފުލުހުން ތަހުގީގު ކުރަމުންދާ މައްސަލަ އަކާ ގުޅިގެން ޝަމްނާޒް އާއި އިތުރު ދެ މީހަކު ހައްޔަރުކޮށްފައިވަނީ މި މަހުގެ 23 ވަނަ ދުވަހުއެވެ.  އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، 7 ދުވަހަށް ބަންދު ކުރުމަށް އަމުރު ކޮށްފައިވާ ކަމަށް ފުލުހުން ވަނީ މީގެ ކުރިން ބުނެފައެވެ.

ހަމައެއާއިއެކު، ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމެއްގެ ތެރެއިން "ރައީސުލްޖުމްހޫރިއްޔާ އާއި، ރައީސުލްޖުމްހޫރިއްޔާގެ ޢާއިލާއަށް ސިހުރު ހެދި ކަމުގެ މައްސަލައެއްތޯ، ތަހުގީގު ކުރެވެނީ އެކަމަށްތޯ އާއި ތުހުމަތު ކުރެވެނީ އެކަމަށްތޯ" ނޫސްވެރިޔަކު ސުވާލުކުރުމުން، ފުލުހުން ވަނީ ތަހުގީގު ކުރަމުންދަނީ "އެފަދަ" މައްސަލައެއްކަން ޔަގީންކޮށްދެއްވާފަ އެވެ.

އެ މައްސަލަ އަކީ ތަހުގީގީ މަރުހަލާގައި އޮތް މައްސަލައަކަށްވުމުން އެކަމާ ގުޅޭ އިތުރު ތަފްސީލު މިވަގުތަށް ހާމަކުރެވެން ނެތް ކަމަށާ ތަހުގީގު ފުރިހަމަކުރެވުމުން ހާމަކުރެވެން ހުރި މައުލޫމާތެއް ހާމަކުރައްވާނެ ކަމަށް ފުލުހުން ވަނީ ބުނެފައެވެ.

މި މައްސަލައާއި ގުޅިގެން ޝަމްނާޒް މަގާމުން ވަކިކޮށްފައިވާއިރު، އޭނާގެ ކުރީގެ ފިރިކަލުން ރަމީޒްވެސް ރައީސް އޮފީހުގެ މިނިސްޓަރު ކަމުން ސަސްޕެންޑް ކޮށްފައިވާ ކަމަށް އެ އޮފީހުން ވަނީ މައުލޫމާތު ދީފައެވެ.

މާލޭ ސިޓީ ކައުންސިލްގެ މެންބަރު ކަން ވެސް ކުރެއްވި ޝަމްނާޒް, ނޮވެމްބަރ މަހުގެ 19 ވަނަ ދުވަހު އިސްތިއުފާ ދެއްވުމުން، މުލިއާގޭގެ އިސްވެރިޔާގެ މަގާމު އޭނާއަށް ދީފައިވާއިރު، އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރު ކަމަށް އައްޔަނު ކުރީ މިއަހަރުގެ އޭޕްރިލް މަހުގެ 4 ވަނަ ދުވަހުއެވެ.