މިއަދު ފެނިގެން މިދަނީ، ފަންނުވެރިންނާއި ފިކުރުވެރިންގެ ބެލެނިވެރިކަން ސަރުކާރުން ނެގި މަންޒަރު ކަމަށް މައްޗަންގޯޅި އުތުރު ދާއިރާގެ މެންބަރު އިބްރާހީމް މުހައްމަދު (އިއްބެ ޖަނާބު) ވިދާޅުވެއްޖެއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި، ކޮޕީރައިޓްސްއާއި އެއާ ގުޅޭ އެހެނިހެން ޙައްޤުތައް ޙިމާޔަތްކޮށްދިނުމާއި، އެފަދަ ޙައްޤުތަކަށް އުނިކަމެއް ލިބިއްޖެނަމަ އެޅޭނެ ފިޔަވަޅުތަކާއި އަދަބުތައް ކަނޑައެޅުމާ ބެހޭ ޤާނޫނަށް އިޞްލާޙު ގެނައުމުގެ ބިލެއް ސަރުކާރުގެ ފަރާތުން ވަނީ ހުށަހަޅާފައެވެ. 

އެ ބިލަށް ބަހުސް ކުރައްވަމުން މެންބަރު އިބްރާޙީމް މުހައްމަދު ވަނީ، އެ ބިލު މަޖިލީހަށް ހުށަހެޅުމާއެކު ފެނިގެންދަނީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ވައުދުފުޅެއް ފުދިގެންދާތަން މަންޒަރު ކަމަށެވެ.

Advertisement

މިއާއެކު މެންބަރު އިބްރާހީމް ވިދާޅުވީ، ކޮޕީރައިޓްގެ ގާނޫނަށް ގެންނަ އިސްލާހުގެ ފައިދާ އެންމެ ބޮޑަށް ކުރާނެ އެއް ބަޔަކީ އެ ދާއިރާގެ ރައްޔިތުން ކަމަށެވެ. 

އެގޮތުން އެފްއެމްސީޖީ ގެ ކޮޕީރައިޓާއި ގުޅުން ހުރި މައްސަލައެއް ދާދިފަހުންވެސް ފެންމަތިވި ކަމަށާ، އެފަދަ ކަންކަމާއި ގުޅިގެން އާއްމުންގެ ސިއްހަތަށްވެސް ގެއްލުން ލިބޭ ކަމަށް އޭނާ ވިދާޅުވިއެވެ. 

ސަރުކާރުގެ ފަރާތުން ނިލަންދޫ ދާއިރާގެ މެންބަރު ސައުދާ ހުށަހެޅި ބިލުގެ ބޭނުމަކީ ކޮޕީ ރައިޓާއި އެއާއި ގުޅޭ އެހެނިހެން ހައްގުތަކުގެ ގާނޫނުގެ ދަށުން ކޮޕީރައިޓުގެ ހިމާޔަތް ލިބިދޭ އުފެއްދުންތަކާއި ކޮޕީރައިޓާއި ގުޅޭ އެ ނޫން ވެސް ހައްގުތަކާއި ބެހޭ ކަންކަން އިތުރަށް ތަފްސީލު ކުރުމެވެ.

މި ބިލުގައި ކޮޕީރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނަށް ވަރަށް ގިނަ އިސްލާހުތަކެއް ހުށަހަޅާފައިވާކަމަށް އޭނާ ވިދާޅުވިއެވެ.

އެގޮތުން ދެވަނަ ބާބާއި ތިން ވަނަ ބާބުގެ ނަން އިސްލާހު ކުރުމާއެކު ދެ ވަނަ ބާބަށް 27 އިސްލާހަކާއި ތިންވަނަ ބާބަށް 16 އިސްލާހެއް ވަނީ ހުށަހަޅާފަ އެވެ.