ފިނޭންސް މިނިސްޓަރު ޑރ. މުޙައްމަދު ޝަފީޤު އަދި އެ މިނިސްޓްރީގެ އިސް އޮފިޝަލުން މިއަދު ވޯލްޑް ބޭންކުން ދިވެހިރާއްޖެ، ނޭޕާލް އަދި ސްރީލަންކާގެ ކަންތައްތަކަށް އަލަށް އައްޔަންކުރެވުނު ކަންޓްރީ ޑިރެކްޓަރު މިސްޓަރ ޑޭވިޑް ސިސްލެން އާ ބައްދަލުކުރައްވައިފިއެވެ.

މި ބައްދަލުވުމުގައި ދިވެހިރާއްޖެ އަދި ސްރީލަންކާގެ ކަންޓްރީ މެނޭޖަރު މިސްޓަރ ގެވޯގް ސަރގްސްޔާން އާއި ބައެއް އިސް އޮފިޝަކުންވެސް ބައިވެރިވެވަޑައިގެންނެވިއެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ސަރުކާރުގެ މާލީ އިސްލާހުތަކާއި، ވޯލްޑް ބޭންކުން އެހީތެރިކަން ފޯރުކޮށްދެވިދާނެ ދާއިރާތަކާ ބެހޭގޮތުންނެވެ. ކަންޓްރީ ޑިރެކްޓަރު މިސްޓަރ ޑޭވިޑް ވަނީ ސަރުކާރުން މާލީ އިސްލާހުތައް ގެނައުމަށް ކުރަމުންދާ މަސައްކަތްތަކަށް ތަޢުރީފުކުރައްވާ، މި އިސްލާހުތަކުގެ މަސައްކަތުގައި ވޯލްޑް ބޭންކުން އެހީތެރިކަން ފޯރުކޮށްދިނުމަށް އަޒުމު ކަނޑައަޅާފައިވާކަން އަލުން ތަކުރާރުކޮށް ވިދާޅުވެފައެވެ.

ވޯލްޑް ބޭންކަކީ ދިވެހިރާއްޖޭގެ ތަރައްޤީގެ މަޝްރޫޢުތަކަށް އެހީތެރިކަން ފޯރުކޮށްދޭ މުހިންމު ބައިނަލްއަޤްވާމީ މާލީ އިދާރާއެކެވެ. މި ބައްދަލުވުމަކީ ވޯލްޑް ބޭންކާއި ދިވެހި ސަރުކާރާ ދެމެދު އޮންނަ ގުޅުން އިތުރަށް ބަދަހިކޮށް، ކުރިއަށް އޮތް ތަނުގައި ކުރެވިދާނެ މަސައްކަތްތަކާ ބެހޭގޮތުން މަޝްވަރާކުރުމަށް ބޭއްވުނު މުހިންމު ބައްދަލުވުމެކެވެ.