އެމެރިކާގެ ރިޔާސީ އިންތިހާބު ވާދަކުރައްވާ އެގައުމުގެ ރައީސް ޖޯ ބައިޑެން ރިޔާސީ އިންތިހާބުން ވަކިވާން ގިނަ ބަޔަކު ގޮވާލަން ފަށައިފިއެވެ.
މިގޮތުން، ބައިޑަން ނިސްބަތްވާ ޕާޓީ، ޑިމޮކްރެޓްގެ ސެނެޓަރެއް ކަމަށްވާ ވަރމޮންޓްގެ ޕީޓަރ ވެލްޗް ވަނީ ބައިޑެން، އޭނާގެ ކެމްޕެއިން ހުއްޓާލަން ޖެހޭ ކަމަށާއި، ރިޔާސީ އިންތިހާބުގެ ބަހުސްގައި ބައިޑަން ދެއްކި ވާހަކަތައް ހަނދާން ނައްތާލުމަށް އުނދަގޫ ވާނެ ކަމަށެވެ.
މަޝްހޫރު ހޮލީވުޑް އެކްޓަރު އަދި ޑިމޮކްރެޓިކް ގެ ފަންޑްރައިޒަރެއް ކަމަށްވާ ޖޯޖް ކްލޫނީ ވެސް ވަނީ ބައިޑެން މި އިންތިހާބުގައި ވާދަކުރާވަރަށް ވުރެ އުމުރުފުޅުން ދުވަސްވެފައިވާ ކަމަށާއި، މިފަހަރުގެ ރިޔާސީ އިންތިހާބު ކާމިޔާބު ނުކުރެވޭނެ ކަމަށް ވިދާޅުވެފައެވެ.
ކްލޫނީ ވިދާޅުވީ، އޭނާ އާއި ބައްދަލުވި އެ ކޮންގްރެސްގެ ކޮންމެ މެމްބަރެއްގެ ވެސް ހިޔާލު ހުރީ މިފަދައިން ކަމަށެވެ.
މީގެ އިތުރުން ވެސް ޑިމޮކްރެޓަށް ނިސްބަތްވާ މެމްބަރުންނާއި އެމެރިކާގެ ރައްޔިތުންވެސް ދަނީ ބައިޑެން ރިޔާސީ އިންތިހާބުގައި ވާދަކުރުމާއި މެދު ކަންބޮޑުވުން ފާޅުކޮށް، ރިޔާސީ ރޭހުން ވަކިވާން ޖެހޭކަމަށް ގޮވާލަމުންނެވެ.
އުމުރުން 81 އަހަރުގެ ބައިޑެން ރިޔާސީ އިންތިހާބުން ވަކިވުމާއި ގުޅޭ އަޑުތައް މިހާ ގަދަވީ، އެމެރިކާގެ ކުރީގެ ރައީސް އަދި މި އިންތިހާބުގެ ކެނޑިޑޭޓް ޑޮނަލްޑް ޓްރަމްޕާއި ބައިޑެން އާއި އެކު ބޭއްވި ބަހުސްގައި ބައިޑެން ދެއްކި ވާހަކަތަކުގެ ސަބަބުންނެވެ. މިގޮތުން ބައިޑެން ވަނީ ޓްރަމްޕްގެ ބައެއް ބަހުގެ ހަމަލާތަކަށް އެކަށީގެންވާ ގޮތެއްގައި ރައްދު ނުދެވުމާއި އެކު، ދެއްކެވި ވާހަކަފުޅު ވެސް ގިނަ ފަހަރުތަކެއްގެ މަތިން އޮޅިވަޑައިގެންފައެވެ.
އެއީ، ދަތުރުކުރުމުގެ ސަބަބުން ވެވަޑައިގެން ވަރުބަލިކަމުގެ ސަބަބުންވީ ކަމެއް ކަމަށް ބައިޑެން ވިދާޅުވިއިރު، އެބޭފުޅާ ވަނީ ރިޔާސީ އިންތިހާބުން ވަކިނުވާނެ ކަމަށް ވިދާޅުވެފައެވެ.
މިއީ އެމެރިކާގެ މުސްތަގުބަލަށް ވަރަށް މުހިންމު އިންތިހާބަކަށް ވާއިރު، ބައިޑެން ގެ އިތުރުން، އިންތިހާބުގައި ވާދަކުރާ ޓްރަމްޕްގެ އުމުރާއި ގުޅިގެން ވެސް ފާޑުކިޔުންތަކެއް އަމާޒުވެފައިވާކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
