ދުނިޔޭގެ އެކި ސަރަހައްދުތަކުން އޭވިއޭޝަން ދާއިރާގެ 150 އަށް ވުރެ ގިނަ މަންދޫބުން ބައިވެރިވި އެއަރ ސަރވިސް ވޯލްޑް ކޮންގްރެސް ކާމިޔާބުކަމާއި އެކު މިއަދު ނިންމާލައިފިއެވެ.

މޯލްޑިވްސް އެއަރޕޯޓްސް ކޮމްޕެނީއާ ގުޅިގެން، މިމަހު 9 އިން 11 އަށް ކުރިއަށް ގެންދިޔަ މި ކޮންގްރެސް އަކީ ގްލޯބަލް ޓްރެވަލް އިންވެސްޓްމެންޓުން އިންތިޒާމްކުރާ ބައިނަލްއަގްވާމީ ހަރަކާތެކެވެ.މި ހަރަކާތުގެ މަޤުސަދަކީ، ވައިގެ ދަތުރުފަތުރުގެ ދާއިރާގެ  ތަފާތު ވިޔަފާރިތަކުގެ މެދުގައި، ނެޓްވޯރކިންގއާއި ވިޔަފާރި ކުރިއެރުވުމެވެ.

މި އަހަރުގެ މި ބައްދަލުވުމުގެ ފެށުމުގެ ރަސްމިއްޔާތު ބާއްވާފައިވަނީ، ޝެރެޓަން މޯލްޑިވްސް ފުލްމޫން ރިސޯޓް އެންޑް ސްޕާގައެވެ. އަދި މި ކޮންގްރެސްގެ ޕެނަލް ޑިސްކަޝަންތަކާއި ނިންމުމުގެ ހަފްލާ ކުރުނބާ މޯލްޑިވްސްގައި ބާއްވާފައިވާއިރު، ނެޓްވާރކިން އިވެންޓުތައް ކުރިއަށް ގެންގޮސްފައިވަނީ ކްރޮސް ރޯޑްސްގެ ސައި ލެގޫންގައެވެ.

މި ހަރަކާތްތަކުގައި ވެލާނާ އިންޓަރނޭޝަނަލް އެއަރޕޯޓާއި، ރާއްޖޭގެ ވައިގެ ޚިދުމަތް ދެމުންގެންދާ އެހެނިހެން ކުންފުނިތަކުންނާއި، އަދި ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުންވެސް ވަނީ އެފަރާތްތަކުން ރާއްޖޭގެ ވައިގެ ސިނާއަތް ތަރައްގީ ކުރުމަށް ކުރަމުންދާ މަސައްކަތްތައް ހިއްސާކޮށް އެކަމުގެ މައުލޫމާތު ފޯރުކޮށްދީފައެވެ.

މި ކޮންގްރެސްގެ ސަބަބުން އޭވިއޭޝަން ދާއިރާ އިތުރަށް ތަރައްޤީކުރުމަށް ސަރުކާރާއި އަމިއްލަ ފަރާތްތަކުން ކުރަމުން އަންނަ މަސައްކަތްތަށް އިތުރު ފުރުސަތުތަކެއް ވަނީ ފަހިވެގެން ގޮސްފައި ވާކަމަށް އެމްއޭސީއެލް އިން ވަނީ ފާހަގަ ކުރައްވާފައެވެ. އަދި ވިޔާފާރީގެ ގުޅުންތައް އުފެދި ވިޔަފާރިތައް ފުޅާކުރުމުގެ ފުރުސަތުތައް ބައިވެރިންނަށް ލިބިގެން ގޮސްފައި ވާކަމަށްވެސް އެމްއޭސީއެލް އިން ބުނެއެވެ.

އެއަރ ސަރވިސް ވޯލްޑް ކޮންގްރެސް، އަކީ 2010 ވަނަ އަހަރުން ފެށިގެން ބާއްވަމުންދާ ބައިނަލްއަޤްވާމީ ބައްދަލުވުމެކެވެ. އަންނަ އަހަރު މި ބައްދަލުވުން ބާއްވަން ކަންޑައަޅާފައިވަނީ ހާޓްސްފީލްޑް- ޖެކްސަން އެޓްލާންޓާ އިންޓަރނޭޝަނަލް އެއަރޕޯޓުގައެވެ.