ފަލަސްޠީނުގެ ބިމަށް ނުހައްގުން ގަދަކަމުން ވެރިވެގަނެގެން އެ ބިމުގައި ދިރިއުޅެމުންދާ އިސްރާއީލުގެ ހަރުކަށި ބޮޑުވަޒީރު ބެންޖަމިން ނެތަންޔާހޫ، ހައްޔަރުކުރުމުގެ އަމުރެއް، އިންޓަނޭޝަނަލް ކްރިމިނަލް ކޯޓުން (އައި.ސީ.ސީ) އިން ނެރެފާނެ ކަމުގެ ބިރަށް، ޗެކް ރިޕަބްލިކާއި ހަންގޭރީއަށް ކުރަން އޮތް ދަތުރު ކެންސަލް ކޮށްފިއެވެ.
އިސްރާއީލުގެ ނޫސްތަކުން ބުނާ ގޮތުގައި، މި މަހުގެ ފަހުކޮޅު އެމެރިކާއަށް ކުރާ ދަތުރުގައި ނެތަންޔާހޫ ވަނީ ޗެކް ރިޕަބްލިކާއި ހަންގޭރީގައި ޓްރާންސިޓް ކުރުމަށް ނިންމާފައެވެ.
ނަމަވެސް، އޭނާ ހައްޔަރުކުރުމުގެ އަމުރެއް ނެރުމުގެ ބިރަށްޓަކައި މި ޕްލޭން ވަނީ މިހާރު ކެންސަލް ކޮށްލާފައެވެ. އަދި ސީދާ އެމެރިކާއަށް ދަތުރުކުރުމަށް ނިންމާފައިވާ ކަމަށްވެސް ބުނެފައިވެއެވެ.
މެއި މަހު، އައި.ސީ.ސީގެ ޗީފް ޕްރޮސެކިއުޓަރ ކަރީމް ޚާން ވަނީ، ހަނގުރާމައިގެ ތެރެއިން ލާއިންސާނީ ޖަރީމާ ހިންގި ކަމުގެ ތުހުމަތުގައި ނެތަންޔާހޫ ހައްޔަރު ކުރުމުގެ އަމުރެއް ނެރުމަށް އެދިފައެވެ.
މިހާރު ފަނޑިޔާރުންގެ ޕެނަލެއް އަންނަނީ މި ވޮރަންޓްތައް ފާސްކުރުމާމެދު މަޝްވަރާކުރަމުންނެވެ. މި ވޮރަންޓްތައް ނެރެފިނަމަ، އައި.ސީ.ސީގެ މެމްބަރުކަން އޮތް 124 ޤައުމުންވެސް، ނެތަންޔާހޫ އެޤައުމަކަށް އައިސްފިނަމަ ހައްޔަރުކުރަން ޖެހޭނެއެވެ.
Advertisement
This content is created and paid for by advertisers and does not involve Voice Journalists
