ހިތަދޫ-ހުޅުމީދޫ ގުޅުވާލާ ރާއްޖޭގެ އެންމެ ބޮޑު ބްރިޖް ގެ މަސައްކަތަށް ބޭނުންވާ ފައިސާ ހަމަޖެހޭ ހިސާބުން އެ ޕްރޮޖެކްޓް ކުރިއަށްގެންދެވޭނެ ކަމަށް އިމާރާތް ކުރުމާއި ބިނާރާ ބެހޭ ވަޒީރު ޑރ. ޢަބްދުالله މުއްޠަލިބު ވިދާޅުވެއްޖެއެވެ.

މިއަދު ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި ހިތަދޫ މެދު ދާއިރާގެ މެމްބަރު އަހުމަދު އަޒާންވަނީ އައްޑޫ ބްރިޖް މަޝްރޫއު ހުއްޓާލާފައިވާކަމަށް ބުނެ އިދިކޮޅު ފަރާތްތަކުން އޮޅުވާލަމުން އަންނަ ކަމަށް ވިދާޅުވެ، އެ މަޝްރޫއުއާއި ގުޅޭ އަޕްޑޭޓާއި އެ މަޝްރޫއު ކުރިއަށްގެންދަން ރާވާފައިވާ ގޮތުގެ އެންމެ ފަހުގެ ހާމަކޮށްދިނުމަށް އެދިވަޑައިގެންފައެވެ.

އަޒާންގެ ސުވާލަށް ޖަވާބު ދެއްވަމުން ވަޒީރު މުއްޠަލިބް ވިދާޅުވީ، އެއީ ސަރުކާރުން އެންމެ އިސްކަން ދޭ އެއް މަޝްރޫއު ކަމަށާއި، ބްރިޖު މަޝްރޫއުގެ ސާވޭގެ މަސައްކަތް ކުރުމަށް މިސްރުގެ ކުންފުންޏަކާއި ހަވާލުކުރިކޮށްފައިވާ ކަމަށެވެ.

Advertisement

އެ ކުންފުންޏާއިއެކު ސޮއި ކުރެވުނު އެމްއޯޔޫގެ ދަށުން އެބޭފުޅުން ފައިސާ ހަމަޖެއްސި ނަމަވެސް، ލޯނު ނަގާނީ ސަރުކާރުން ކަމަށާއި، އެގޮތަށް ކުރިއަށް ދިޔުމަށް ބައެއް ފަރާތްތަކާއިއެކު މަޝްވަރާ ކުރަމުން އަންނަަ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ފައިސާ ހަމަނުޖެހެނީސް ކޮންޓްރެކްޓަށް ވަންނަން ބޭނުންނުވާ ކަމަށާއި، ސަރުކާރުން އެއްބަސްވެވޭ ކަހަލަ ފައިނޭންސިން އެއް ހަމަޖެހިއްޖެނަމަ ސޮއިކުރާނެ ކަމަށާއި، އެހެންނަމަވެސް، ހަމަނުޖެހޭ ކަމަށް ވާނަމަ، އެ މަސައްކަތްކުރެވޭ އެހެން ފަރާތަކާއި އެކު އެ މަސައްކަތްކުރިއަށްގެންދާނެ ކަމަށެވެ.

މިވަގުތު ކުރިއަށްދަނީ މިހާރު އެ މަޝްރޫއުއަށް ސޮއިކޮށްފައިވާ ފަރާތުން ހުށަހަޅާފައި އޮތް ފައިނޭންސިން ކަންތައްތައް އެއި ސަރުކާރަށް އެއްބަސްވެވޭނެ ކަމެއްތޯ ނުވަތަ ނޫންތޯ ބަލައި، އެފަރާތާއި މަޝްވަރާކުރުމުގެ މަސައްކަތްކަމަށް ވަޒީރު ވިދާޅުވިއެވެ.

އައްޑޫ ބްރިޖް  އެޅުމަށް ކުރަންޖެހޭ ދިރާސާތައް ކުރިއަށްގެންދިޔުމަށް މިސްރުގެ ކުންފުންޏެއް ކަމަށްވާ "ދަ އަރަބް ކޮންޓްރެކްޓާސް - އޮސްމާން އަހުމަދު އޮސްމާން އެންޑް ކޯ" އާއި ހަވާލުކުރީ މިދިޔަ ފެބްރުއަރީ މަހުގެ 19 ވަނަ ދުވަހުއެވެ.

އެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުއްޠަލިބް ވަނީ ދިރާސާތައް ކުރިއަށް އޮތް ތިން މަސް ދުވަސްތެރޭ ނިންމާ، މި އަހަރުތެރޭ މި ބްރިޖް ގެ އަމަލީ މަސައްކަތް ފެށިގެންދާނެ ކަމަށް ވިދާޅުވެފައެވެ.