ކުޅިވަރާއި ހަށިހެޔޮކަމާއި ބެހޭ ވުޒާރާގެ ވިސްނުމަކީ އެކި ރަށްރަށުގައި ކުރިއަށް ގެންދާ ޕްރޮޖެކްޓް ތަކުގެ މަސައްކަތް ފަށާފައި، ނުހުއްޓޭނެ ގޮތަށް އެ ޕްރޮޖެކްޓްތަކުގެ މަސައްކަތް ކުރިއަށް ގެންދިޔުން ކަމަށް އެ ވުޒާރާގެ ވަޒީރު އަބްދުالله ރާފިޢު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރު ރާފިޢު އާއި ސުވާލު ކުރުމަށް މަޖިލީހަށް ހާޒިރުކުރެވިފައިވާއިރު، ގިނަ ރަށްތަކެއްގެ ފުޓްބޯޅަ ދަނޑުގެ މަސައްކަތް ބަޖެޓް ކުރެވިފައި ވީނަމަވެސް ޓެންޑަރ ނުކުރެވި، ނޫނީ ފެށުފައި ހުރި ދަނޑުތަކުގެ މަސައްކަތް ކުރިއަށް ނުދަނީ ކީއްވެތޯ މެންބަރުން ވަނީ ސުވާލު ކުރައްވާފައެވެ.
އެ ސުވާލައް ޖަވާބު ދެއްވަމުން ވަޒީރު ވިދާޅުވީ، ޕްރޮޖެކްޓް ތަކަށް ބަޖެޓް ހަމަޖެހިފައި އޮތް ގޮތުން، އަހަރުގެ ކުރީކޮޅު އެ ޕްރޮޖެކްޓްގެ މަސައްކަތް ފެށިއްޖެ ނަމަ، ވަކި ހިސާބަކުން ބަޖެޓްގެ ތާށިކަން އައުމުގެ ސަބަބުން މަސައްކަތް ހުއްޓިގެންދާނެ ކަމަށެވެ. އެހެން ވެއްޖެނަމަ، އެކަމުގެ ސަބަބުން ރައްޔިތުންނަށް ދަތިތަކާއި ކުރިމަތިލާން ޖެހޭނެކަން ފާހަގަކުރައްވައި ވަޒީރު ވިދާޅުވީ، އެ ވުޒާރާއިން މަސައްކަތް ކުރަމުންދަނީ މަސައްކަތް ނުހުއްޓި ކުރިއަށްދާނެ ގޮތަށް ކަންކަން ހަމަޖެއްސެވުމަށް ކަމަށެވެ.
އަހަރުގެ ކުރީކޮޅު ބަޔަކާއި މަސައްކަތް ހަވާލުކޮށްފި ނަމަ، (ޕްރޮޖެކްޓުގެ) ދެވަނަ ޕޭމަންޓް އަންނައިރު އޮންނާނީ މަސައްކަތް ހުއްޓިފައި. އެހެންވީމާ، ވާގޮތަކީ، ކުރީގައި ބޭނުންކުރާ ދަނޑު ބޭނުން ނުކުރެވި އޮތީމާ ރައްޔިތުންނަށް ވަރަށް ބޮޑު ނުތަނަވަސް ކަމަކާ ކުރިމަތިލާންޖެހޭ. ކުޅެ ކުޅެ ތިބި ދަނޑެއްގައި މަސައްކަތް ކުރާތީ ނުކުޅެވި ރައްޔިތުން ތިބެންޖެހެނީ. ދެން މި މަސައްކަތް ނުފެށިނަމައޭ ރައްޔިތުން ބުނާ ހިސާބުގައި ކަން އޮންނަނީ. އެހެންވީމާ، އަޅުގަނޑުމެންގެ ވިސްނުން މިހުރީ މަސައްކަތް ފަށާފައި މަސައްކަތް ނުހުއްޓި ކުރިއަށް ގެންދެވޭނެ ގޮތެއް ވޭތޯ. ޕްރޮޖެކްޓްގެ ޑިޔުރޭޝަން ކުޑަކޮށްގެން. އަހަރުގެ ކުރީކޮޅުގައި އަޅުގަނޑުމެން އިއުލާން ކުރީ ކަމުގައި ވަނީނަމަ، ވަކި ހިސާބަކުން ޖެހޭނީ ހުއްޓާލާފައި ބާއްވަން އަންނަ އަހަރު ބަޖެޓަށް ލައިގެން މަސައްކަތް ކުރިއަށް ގެންދަން.
ވަޒީރު އަބްދުالله ރާފިޢު
ކަންމިހެން ހުރުމުން، ދަނޑުތައް ފަދަ ޕްރޮޖެކްޓްގެ މަސައްކަތް، އަހަރުގެ ފަހުކޮޅުގައި އިއުލާން ކޮށްގެން މަސައްކަތް ފެށުމަށް ނިންމަވާފައިވާ ކަމަށާ، އެގޮތަށް ކަން ކުރުމުން، އަހަރު ނިމޭއިރު ބަޖެޓް ހުސްވި ނަމަވެސް، އަނެއް އަހަރު ފެށިގެންދާއިރު ޕްރޮޖެކްޓަށް ބަޖެޓް ހަމަޖެހި، މަސައްކަތް ހުއްޓުމެއްނެތި ކުރިއަށް ގެންދެވޭނެ ކަމަށް ވަޒީރު ވިދާޅުވިއެވެ.
އެ ވުޒާރާއިން މި ފަދައިން ޕްރޮޖެކްޓްތައް ގެންދިޔުމަށް ނިންމާފައިވަނީ، ސަރުކާރު އައުމަށްފަހު، ވުޒާރާގެ ކަންކަން ކުރިން ކުރިއަށް ގޮސްފައިވާ ގޮތަށް ބަލައި، އެކި ފަރާތްތަކުގެ ޚިޔާލާއި މަޝްވަރާ ހޯދުމަށް ފަހުގައި ކަމަށްވެއް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
