ރައްޔިތުންގެ މަޖިލީހުގެ މެމްބަރުންގެ މާލީ ބަޔާންތައް ހުށަހަޅަންޖެހޭ މުއްދަތު އަވަސްކުރުމަށް މަޖިލީހުގެ ގަވާއިދު ބަދަލުކުރަން ރައްޔިތުންގެ މަޖިލީހުގެ އާންމު ކޮމިޓީން ފާސްކޮށްފިއެވެ.

މަޖިލީހުގެ ގަވާއިދު އިސްލާހުކުރުމަށް އާންމު ކޮމިޓީން މިއަދު ބޭއްވި ބައްދަލުވުމުގައި މިކަމާއި ގުޅޭ އިސްލާހު ހުށަހެޅުއްވުމަށް  މަޖިލީހުގެ ކައުންސެލް ޖެނެރަލް ފާތިމަތު ފިލްޒާ ދެއްވާފައިވާ ލަފާ ވަނީ އިއްވާފައެވެ.

ފިލްޒާ ދެއްވި ލަފާގައިވަނީ މަޖިލީހުގެ މެންބަރުން މަގާމުގެ ހުވައިކުރައްވާތާ 90 ދުވަސް ނުވަތަ ތިން މަސް ތެރޭ އެ މެންބަރެއްގެ މިލްކިއްޔާތުގައި ހިމެނޭ މުދަލާއި ފައިސާގެ މާލީ ބަޔާން މަޖިލީހުގެ އިދާރައަށް ހުށަހަޅަން ލާޒިމުކޮށް، ކޮންމެ އަހަރަކު އެއްފަހރު މާލީ ބަޔާން ހުށަހަޅަންޖެހޭ ގޮތަށް ގަވާއިދުގައި ހިމެނުމަށެވެ.

އެއާއިއެކު، މިއަދު ބޭއްވި އާންމު ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އަޣުލަބިއްޔަތުން، ފިލްޒާގެ ލަފައާ އެއްގޮތަށް މަޖިލީހުގެ މެންބަރުންގެ މާލީ ބަޔާން ހުށަހެޅުމާ ގުޅޭ މާއްދާ ބަދަލުކުރުމަށް ވަނީ ނިންމާފައެވެ.

މީގެ ކުރިން މަޖިލީހުގެ ގަވާއިދުގައިވާ ގޮތުން،  މެންބަރުންނާއި އެމީހުންގެ އަނބިން ނުވަތަ ފިރިންގެ މާލީ ބަޔާން މަޖިލީހަށް ހުށަހަޅަންޖެހެނީ ހުވައިކުރައްވާތާ އެއް އަހަރު ދުވަސް ފަހުންނެވެ. އަދި މިހާރު އަމަލުކުރަމުންދާ ގަވާއިދުގެ މާލީ ބަޔާން ކޮންމެ އަހަރެއްގެ އޯގަސްޓު މަހުގެ 31 ވަނަ ދުވަހުގެ ކުރިން ހުށަހަޅަން ޖެހޭނެއެވެ.

އެހެންކަމުން މި އަހަރު މެއި މަހުގެ 20 ވަނަ ދުވަހު ހުވާކުރެއްވި މެމްބަރުންގެ މާލީ ބަޔާން ހުށަހަޅުއްވަން ޖެހޭނީ މިއަހަރުގެ އޮގަސްޓް މަސް ނިމުމުގެ ކުރިންނެވެ.