ޣައްޒާގެ މުސްލިމުންނާއި ދެކޮޅަށް އިސްރާއީލުން ހިންގަމުންދާ ގަތުލުއާއްމުގެ ސަބަބުން ފުޓުބޯޅައިން އެގައުމު ސަސްޕެންޑް ކުރުމަށް އެތައް ބަޔަކު ގޮވަމުންދާ ދަނޑިވަޅެއްގައި، އެކަމާއި މެދު ގޮތެއް ނިންމުން ދުނިޔޭގެ ފުޓުބޯޅައިގެ މައި އިދާރާ، ފީފާއިން ފަސްކޮށްފިއެވެ.

އިޒްރޭލް ސަސްޕެންޑު ކުރުމަށް އެދި ފަލަސްތީނުން ފީފާއަށް ހުށައަޅާފައިވާއިރު، މީގެ ކުރިން ބެންކޮކްގައި ބޭއްވި ފީފާގެ ކޮންގްރެސްއެއްގެ ތެރެއިން ފީފާގެ ރައީސް ޖިއާނީ އިންފަންޓީނޯ ވަނީ ފުޓުބޯޅައިގެ އެންމެހާ ޙަރަކާތްތަކުން އިޒްރޭލް ސަސްޕެންޑު ކުރުމާ މެދު، ޤާނޫނީ ލަފާ ހޯދުމަށް ފީފާއިން ނިންމާފައިވާކަމަށް އިއުލާނުކޮށްފައެވެ.

އެހެންނަމަވެސް، ފްރާންސްގެ ޕެރިސްގައި ކުރިއަށްދާ އޮލިމްޕިކްސް އަށް ފަހު އެކަމާއި މެދު ގޮތެއް ނިންމުމަށް ފީފާއިން ފަސްކޮށްފައިވާކަން ހާމަކޮށްފައިވަނީ އިސްރާއީލާއި ފަލަސްތީނުންވެސް މި މައްސަލައާއި ގުޅޭގޮތުން ތައްޔާރީތަކެއް ވާން އެދިފައިވާތީ ކަމަށް ބުނެއެވެ.

ފީފާއިން ބުނީ، މި މައްސަލައާއި ގުޅޭގޮތުން ހަދާފައިވާ ގާނޫނީ ދިރާސާ 31 އޯގަސްޓް ގެ ކުރިން އެ ޖަމްޢިއްޔާގެ ކައުންސިލާ ހިއްސާކުރެވޭނެ ކަމަށެވެ.

ފީފާއިން މިކަމާއި މެދު ގޮތެއް ނިންމުން ފަސްކުރުމާއިއެކު، ޖުލައި މަހުގެ 26 އިން އޮގަސްޓްމަހުގެ 11 އާއި ހަމައަށް ބާއްވާ އޮލިމްޕިކްސްގައި އިސްރާއީލު ވާދަކުރުމުގެ ފުރުސަތު މިވަނީ ފަހިވެފައެވެ.

މިކަމާއި ގުޅިގެން ފަލަސްތީންގެ ފުޓްބޯޅަ އެސޯސިއޭޝަން (ޕީއެފްއޭ) އިން ނެރުނު ބަޔާނެއްގައި ބުނީ، ފީފާއިން ފޮނުވި ސިޓީއެއް ލިބިފައިވާ ކަމަށާއި، އެ ސިޓީގައި މައްސަލަ ފަސްކުރި ކަމުގެ މަޢުލޫމާތު ދީފައިވާ ކަމަށެވެ. ޕީއެފްއޭ އިން ބުނީ ފީފާގެ ސިޓީގައި، ޤާނޫނީ ލަފާ ކައުންސިލަށް ހުށަހެޅުމުން އެ ލަފާ ބަލައިގަންނާނެ ގޮތުގެ ތަފްސީލް ބަޔާންކޮށްފައި ނުވާތީ  އިތުރު މަޢުލޫމާތު ހޯދުމަށް އެދިފައިވާ ކަމަށެވެ.

ފާއިތުވެދިޔަ ހަފްތާގައި ބައިނަލްއަޤްވާމީ ފެންވަރުގެ ޤާނޫނީ ވަކީލުންތަކެއް ތައްޔާރުކުރި ރިޕޯޓެއްގައި ވަނީ ފީފާގެ ގަވާއިދުތަކުގެ ތެރެއިން އިންސާނީ ޙައްޤުތަކާއި އިންސާނިއްޔަތުގެ މަޤްޞަދުތަކާ ގުޅުންހުރި އެތައް ގަވާއިދަކާއި އިސްރާއީލުން ޚިލާފުވެފައިވާތީ، އެ ޤައުމު ފީފާއިން ސަސްޕެންޑް ކުރަން ޖެހޭކަމަށް ބުނެފައެވެ.

ޔަހޫދީން ޣައްޒާގައި ހިންގަމުންދާ އުދުވާނުގައި ފަލަސްތީނުގެ ކުޅިވަރާއި ބެހޭ ފަރާތްތަކާއި ފީފާގެ މުއައްޒަފުންނާއި އެތުލީޓުން ހިމެނޭހެން 300 އަށް ވުރެ ގިނަ މީހުން ވަނީ ޝަހީދުކޮށްލާފައިވާކަން ފާހަގަކޮށްލަން ޖެހެއެވެ.

އިސްރާއީލު ފުޓުބޯޅައިން ސަސްޕެންޑް ކުރުމަށް "#ރެޑްކާޑްއިސްރާއީލް" ގެ ނަމުގައި ސޯޝަލް މީޑިއާ ކެމްޕޭނެއް ވެސް ފަށާފައިވާއިރު، މި ކެމްޕޭންގައި 4 މިލިއަނަށް ވުރެ ގިނަ މީހުން ބައިވެރިވެ، އިސްރާއީލާއި މެދު ފިޔަވަޅު އެޅުމަށް ވަނީ ގޮވާލާފައެވެ.

އިސްރާއީލު ފުޓްބޯޅަ އެސޯސިއޭޝަން (އައިއެފްއޭ) ފުޓުބޯޅައިން ސަސްޕެންޑް ކުރުމަށް ހުށަހަޅާފައިވާއިރު، މީގެ ދެ އަހަރު ކުރިން ފީފާ އިން ވަނީ ރަޝިއާ އާއި ޔޫކްރެއިން ގެ ހަނގުރާމަ ފެށުނުތާ 4 ދުވަހުގެ ތެރޭގައި ބައިނަލްއަގްވާމީ މުބާރާތްތަކުން ރަޝިއާ ސަސްޕެންޑް ކުރުމަށް ނިންމާފައެވެ.