ފަލަސްޠީނުގެ މުސްލިމުން އަޅުވެތި ކޮށް، ޔަހޫދީ ޣައިރު ގާނޫނީ ދައުލަތް، އިސްރާއީލުން ހިންގަނީ ބައިނަލްއަޤުވާމީ ޤާނޫނުތަކާ ޚިލާފު ސިޔާސަތުތަކެއްކަމަށް އދގެ އެންމެ މަތީ ކޯޓު, އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ)ން ކަނޑައަޅައިފިއެވެ.

އައިސީޖޭގެ ފަނޑިޔާރުން ނެރުނު އިރުޝާދީ ލަފާގައި ބުނެފައި ވަނީ, ފަލަސްތީނުގެ ގުދުރަތީ ވަސީލަތްތަކުން ޔަހޫދީން ބައިނަލްއަގުވާމީ ގާނޫނުތަކާއި ހިލާފަށް ފައިދާ ހޯދަމުންދާ ކަމަށާއި، ބައިނަލްއަޤުވާމީ ޤާނޫތަކާއި, ޖެނީވާ ކޮންވެންޝަންގެ އިތުރުން އދގެ ޗާޓަރާ ޔަހޫދީން ޚިލާފުވެފައިވާ ކަމަށެވެ.

އައިސީޖޭގެ ރައީސް ނަވާފް ސަލާމް ވިދާޅުވީ ފަލަސްތީނުގެ ބިންތަކުގައި ޔަހޫދީން ތިބުމަކީ ޤާނޫނާ ޚިލާފު ކަމެއްކަމަށް ކޯޓުން ދެކޭކަމަށާއި، އެބިންތައް ދޫކޮށް ވީހާވެސް އަވަހަކަށް ޔަހޫދީން ދިއުމަކީ އެމީހުންގެ މައްޗަށް ލާޒިމު ކަމެއް ކަމަށެވެ.

އައިސީޖޭއިން އިތުރަށް ބުނީ، ޔަހޫދީން ގަދަކަމުން ވެރިވެގެންފައިވާ ސަރަހައްދުތައް ކަމަށްވާ ވެސްޓް ބޭންކާއި އިރުމަތީ ޖެރޫސަލަމްގައި ދިރިއުޅޭ ޔަހޫދީން އެތަނުން ނުކުމެ، އެތަން އެމީހުން ހިފުމުގެ ސަބަބުން ފަލަސްތީނުގެ ރައްޔިތުންނަށް ލިބުނު ގެއްލުމުގެ ބަދަލު ދޭން ޖެހޭކަމަށެވެ.

ފަލަސްތީނުގެ ރައްޔިތުންގެ އިންސާނީ ޙައްޤުތަކަށް ޔަހޫދީން އަރައިގަނެފައިވާކަން ފާހަގަކުރަމުން އައިސީޖޭއިން ބުނީ، ފަލަސްޠީނުގެ މުސްލިމުންގެ މިނިވަން ކަމުގެ ޙައްޤަށް ޔަހޫދީން އަރައިގަނެފައިވާ ކަމަށާއި, ފަލަސްތީނުގެ ބިންތަކަށް ޔަހޫދީން ވެރިވެގަތީ ގަދަބާރުން ކަމަށެވެ. މިއީ ވެސް ޔަހޫދީން ބައިނަލްއަޤުވާމީ ޤާނޫނުތަކާ ޚިލާފަށް ހިންގަމުންދާ އަމަލެއްކަމަށް އައިސީޖޭއިން ވަނީ ކަނޑައަޅާފައެވެ.

މީގެ އިތުރުންވެސް އައިސީޖޭއިން ވަނީ ޔަހޫދީން ގަދަކަމުން ވެރިގެންފައިވާ ސަރަހައްދުތަކުގައި ދިރިއުޅެމުންދާ ފަލަސްތީނުގެ ރައްޔިތުންނަށް ކުރިމަތިކުރުވާ ދަތިތަކަކީ އެމީހުންގެ ނަސްލާއި މެދު ގެންގުޅޭ ތަފާތުކުރުމެއް ކަމަށް ސިފަކޮށްފައެވެ.

ހަމައެއާއިއެކު، ޔަހޫދީން ޣައްޒާގައި ހިންގަމުންދާ އުދުވާނު ދެމިގެންދާނެ ފަދަ ކަމެއް ކުރުމުންނާއި އެކަމަށް މަގުފަހިވާނެފަދަ އެއްވެސް އެހީތެރިކަމެއް ދިނުމުން ބައިނަލްއަގުވާމީ މުޖުތަމައު ދުރުހެލިވުމަށް އެކޯޓުން ވަނީ ގޮވާލާފައެވެ.

އައިސީޖޭ ގެ މި ނިންމުން ބަލައިގަނެ، ފަލަސްތީނުން ބުނީ، މިއީ ފަލަސްޠީނު ރައްޔިތުންގެ ޙައްޤުތަކަށާއި އެމީހުންގެ އަމިއްލަ ނިންމުންތައް ނިންމުމުގެ ޙައްޤަށް ލިބުނު ތާރީޚީ ކާމިޔާބީއެއް ކަމަށާއި، ބައިނަލްއަޤްވާމީ މުޖުތަމަޢުން އައިސީޖޭގެ މި ރައުޔު ބަލައިގަނެ، ފަލަސްތީނުގެ ބިންތަކަށް ޔަހޫދީން ވެރިގަތުން ނިމުމަކަށް ގެނެވޭނެކަމަށް އުންމީދުކުރާ ކަމަށެވެ.

މި މައްސަލައިގެ އިތުރުންވެސް، ޣައްޒާގައި ހިންގަމުންދާ ގަތުލުއާއްމާއި ގުޅިގެން އިސްރާއީލާއި ދެކޮޅަށް ދެކުނު އެފްރިކާއިން އައިސީޖޭއަށް ހުށަހަޅާފައިވާ މައްސަލައެއްވެސް ކުރިއަށްދާކަން ފާހަގަކޮށްލަން ޖެހެއެވެ.