ފަލަސްޠީނުގެ މުސްލިމުން އަޅުވެތި ކޮށް، ޔަހޫދީ ޣައިރު ގާނޫނީ ދައުލަތް، އިސްރާއީލުން ހިންގަނީ ބައިނަލްއަޤުވާމީ ޤާނޫނުތަކާ ޚިލާފު ސިޔާސަތުތަކެއްކަމަށް އދގެ އެންމެ މަތީ ކޯޓު, އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ) އިން ކަނޑައަޅައެޅުމާއިއެކު، ފަލަސްތީނުގައި މިނިވަން ދައުލަތެއް އުފެދުމުގެ އުންމީދު އާވެގެންދާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، އައިސީޖޭގެ ފަނޑިޔާރުން ނެރުނު އިރުޝާދީ ލަފައަށް މަރުޙަބާ ވިދާޅުވެ އެކްސްގައި ކުރެއްވި ޕޯސްޓެއްގައެވެ.

މިގޮތުން ރައީސް ޑރ.މުޢިއްޒު ވިދާޅުވީ، ގާނޫނުތަކާއި ހިލާފަށް އިސްރާއީލުން ފަލަސްތީނުގައި ދެމި ތިބުމަކީ ބައިނަލްއަޤްވާމީ އިންސާނީ ޤާނޫނުގެ ޚިލާފު ކަމެއްކަމަށް އައިސީޖޭ އިން ބަޔާންކުރުމާއިއެކު، ފަލަސްތީނުގައި މިނިވަން ދައުލަތެއް އުފެދެމުގެ އުންމީދު އާވެގެންދާ ކަމަށެވެ.

Advertisement

ރައީސް ޑރ.މުޢިއްޒު ވަނީ އިސްރާއީލުން ގާނޫނާއި ޚިލާފަށް ފަލަސްތީނުގައި ވަޒަންވެރިވުމުގެ ސިޔާސަތުތައް ވަގުތުން ނިމުމަކަށް ގެނެސް، ފަލަސްތީނާއި މެދު ގެންގުޅޭ ތަފާތުކުރުންތަކާއި ނަހަމަ އުޞޫލުތަކުގެ ސަބަބުން ލިބުނު ގެއްލުންތަކަށް ބަދަލު ދިނުމަށް ގޮވާލައްވާފައެވެ. 

މިލަފައާއި ގުޅިގެން 1967 ގެ ކުރީގެ ބޯޑަރުތަކުގެ މައްޗަށް އެކުލެވިފައިވާ، އިރުމަތީ ޤުދުސް ވެރިރަށެއްގެ ގޮތުގައި ކަނޑައެޅިފައިވާ މިނިވަން އަދި މުސްތަޤިއްލު ފަލަސްޠީނުގެ ދައުލަތެއް ޤާއިމުކުރުމާއިމެދު ރާއްޖެއިން ކުރަމުންދާ އުންމީދު އައުވެފައިވާ ކަމަށް ވެސް ރައީސް ޑރ.މުޢިއްޒު ވިދާޅުވިއެވެ.

އައިސީޖޭގެ ފަނޑިޔާރުން ނެރުނު އިރުޝާދީ ލަފާގައި ބުނެފައި ވަނީ, ފަލަސްތީނުގެ ގުދުރަތީ ވަސީލަތްތަކުން ޔަހޫދީން ބައިނަލްއަގުވާމީ ގާނޫނުތަކާއި ހިލާފަށް ފައިދާ ހޯދަމުންދާ ކަމަށާއި، ބައިނަލްއަޤުވާމީ ޤާނޫތަކާއި, ޖެނީވާ ކޮންވެންޝަންގެ އިތުރުން އދގެ ޗާޓަރާ ޔަހޫދީން ޚިލާފުވެފައިވާ ކަމަށެވެ.

އައިސީޖޭއިން އިތުރަށް ބުނީ، ޔަހޫދީން ގަދަކަމުން ވެރިވެގެންފައިވާ ސަރަހައްދުތައް ކަމަށްވާ ވެސްޓް ބޭންކާއި އިރުމަތީ ޖެރޫސަލަމްގައި ދިރިއުޅޭ ޔަހޫދީން އެތަނުން ނުކުމެ، އެތަން އެމީހުން ހިފުމުގެ ސަބަބުން ފަލަސްތީނުގެ ރައްޔިތުންނަށް ލިބުނު ގެއްލުމުގެ ބަދަލު ދޭން ޖެހޭކަމަށެވެ.

ފަލަސްތީނުގެ ރައްޔިތުންގެ އިންސާނީ ޙައްޤުތަކަށް ޔަހޫދީން އަރައިގަނެފައިވާކަން ފާހަގަކުރަމުން އައިސީޖޭއިން ބުނީ، ފަލަސްޠީނުގެ މުސްލިމުންގެ މިނިވަން ކަމުގެ ޙައްޤަށް ޔަހޫދީން އަރައިގަނެފައިވާ ކަމަށާއި, ފަލަސްތީނުގެ ބިންތަކަށް ޔަހޫދީން ވެރިވެގަތީ ގަދަބާރުން ކަމަށެވެ. މިއީ ވެސް ޔަހޫދީން ބައިނަލްއަޤުވާމީ ޤާނޫނުތަކާ ޚިލާފަށް ހިންގަމުންދާ އަމަލެއްކަމަށް އައިސީޖޭއިން ވަނީ ކަނޑައަޅާފައެވެ.

މީގެ އިތުރުންވެސް އައިސީޖޭއިން ވަނީ ޔަހޫދީން ގަދަކަމުން ވެރިގެންފައިވާ ސަރަހައްދުތަކުގައި ދިރިއުޅެމުންދާ ފަލަސްތީނުގެ ރައްޔިތުންނަށް ކުރިމަތިކުރުވާ ދަތިތަކަކީ އެމީހުންގެ ނަސްލާއި މެދު ގެންގުޅޭ ތަފާތުކުރުމެއް ކަމަށް ސިފަކޮށްފައެވެ.

ހަމައެއާއިއެކު، ޔަހޫދީން ޣައްޒާގައި ހިންގަމުންދާ އުދުވާނު ދެމިގެންދާނެ ފަދަ ކަމެއް ކުރުމުންނާއި އެއްވެސް އެހީތެރިކަމެއް ދިނުމުން ބައިނަލްއަގުވާމީ މުޖުތަމައު ދުރުހެލިވުމަށް އެކޯޓުން ވަނީ ގޮވާލާފައެވެ.

މި މައްސަލައިގެ އިތުރުންވެސް، ޣައްޒާގައި ހިންގަމުންދާ ގަތުލުއާއްމާއި ގުޅިގެން އިސްރާއީލާއި ދެކޮޅަށް ދެކުނު އެފްރިކާއިން އައިސީޖޭއަށް ހުށަހަޅާފައިވާ މައްސަލައެއްވެސް ކުރިއަށްދާކަން ފާހަގަކޮށްލަން ޖެހެއެވެ.