މާލޭގެ އަމީނީމަގުގައި ހުންނަ ކޭއެފްސީ ރެސްޓޯރަންޓުގެ ބިއްލޫރިގަނޑު ތަޅާލި މައްސަލާގައި 48 އަހަރުގެ ދިވެހި ފިރިހެނަކު ފުލުހުން ވަނީ ހައްޔަރުކޮށްފައެވެ.

ފުލުހުން މަޢުލޫމާތު ދިންގޮތުގައި މި މީހާ ހައްޔަރުކޮށްފައިވަނީ މިދިޔަ އަންގާރަ ދުވަހުގެ ރޭ ހިނގި ހާދިސާއާ ގުޅިގެންނެވެ. ނަމަވެސް ބުދަ ދުވަހުގެ ރޭ ހިނގި ހާދިސާއާ ގުޅިގެން އަދި އެއްވެސް މީހަކު ހައްޔަރުކޮށްފައި ނުވާކަމަށް ފުލުހުން ބުނެފައިވެއެވެ.

ކޭއެފްސީ ރެސްޓޯރަންޓުގެ ބިއްލޫރިގަނޑު ވަނީ މިދިޔަ ދެ ރޭ މަތިން ތަޅާލާފައެވެ. މިކަން ހިނގަމުންދަނީ ޣައްޒާގެ ހަނގުރާމަ ފެށުނު ފަހުން، ކޭއެފްސީން އިޒްރޭލަށް އެހީތެރިވާ ކަމަށް ބުނެ، އެތަނުން ވިޔަފާރި ނުކުރުމަށް ގޮވާލައި މާލޭގައި އަޑުއުފުލަމުންދާ ދަނޑިވަޅެއްގައެވެ.

Advertisement

މީގެ އިތުރުން، ކޭއެފްސީ ބޮއިކޮޓްކުރުމަށް ގޮވާލާ ޕޯސްޓަރުތައް ވެސް އެ ރެސްޓޯރަންޓުގެ ބޭރުގައި ދޭތެރެދޭތެރެއިން ހަރުކުރަމުންދާކަން ފާހަގަކުރެވެއެވެ. މި މައްސަލައާ ގުޅިގެން ތަޙުޤީޤު ކުރިއަށްދާކަމަށް ފުލުހުން މަޢުލޫމާތު ދީފައިވެއެވެ.